足球轉會費世界紀錄俾加里夫巴利打破後，皇家馬德里翼鋒基斯坦奴朗拿度（C朗）為保1哥地位，梗係要發威，上周五世界盃外圍賽協助葡萄牙大炒北愛爾蘭，仲個人獨取3球，破咗名宿「黑豹」尤西比奧嘅國家隊入球紀錄。
首次國際賽中三元
C朗被巴利挑戰首席球星地位，佢又點可以偷懶；上周五作客北愛，主隊球迷仲唱歌寸C朗係「cheap版巴利」，好在C朗下半場發功，由68分鐘開始攻入3球，協助葡萄牙以4:2反勝主隊，以8戰17分上番F組榜首，不過同日俄羅斯4:1輕取盧森堡，以7戰15分排第2，首名直接出線權仍然有排鬥。
28歲嘅C朗累積43個國家隊入球，過咗41球嘅尤西比奧升上第2位，距離射手保列達嘅47球國家隊第1紀錄，只差4球，如無意外呢一、兩年都可望打破，不過C朗因為腱炎，唔會代表葡軍周二喺美國友賽巴西。首次為葡萄牙連中三元，C朗賽後講：「喺球會比賽就經常連中三元，今次終於喺國際賽做到，十分開心同特別，能夠超越尤西比奧更加興奮，因為佢係葡萄牙最出色嘅足球員。」原來上周五係C朗父親死忌，C朗賽後更加喺fb留言，將勝利獻畀8年前過身嘅亡父。
C朗上周五入球超越尤西比奧，德國老牌射手高路斯，亦都追平名宿武勒嘅紀錄；德國上周五3:0大炒奧地利，續居C組榜首，最開心自然係35歲嘅高路斯，因為佢先開紀錄，個人國際賽累積入球達到68個，追平名宿「轟炸機」武勒嘅紀錄。
高路斯平武勒紀錄
咪睇高路斯35歲先追平紀錄，好似年紀好大，原來武勒都要踢到39歲先入68球，高路斯都仲後生佢4年。德國下場就作客魚腩法羅群島，高路斯生生性性破埋紀錄一啲都唔難。另外，呢場喺慕尼黑安聯球場進行嘅世盃外比賽，德國賽前就為兩位新舊拜仁球員進行紀念儀式，包括為前德國隊長波歷克告別，亦都為現任隊長拿姆第100次國家隊上陣，頒發紀念品。
激戰拍續集，但家輝話唔敢再變筋肉人？
到底練定唔練？即睇足本《亂噏24》，專訪張家輝、林超賢！
http://bit.ly/appletalk24