在娛樂圈浮沉多年的張立基，在內地另謀發展十多二十年，以為他銷聲匿迹了，兩年前又悄然回流返港，現年45歲的他前半生大起大落，最近因客串電影《重口味》再唱出金曲《Electric Girl》，勾起大家的那些年回憶，當年曾為情自殺、死過翻生的張立基人到中年，豪情壯志俱往矣，現在學懂了放下！
撰文：余燕儀
張立基在電影《重口味》客串演出，扮回自己演繹《Electric Girl》，竟然成為全片的亮點，首映當晚反應最好，90年他憑這首歌闖出名堂，沉寂多年後，今日再憑這首歌尋回失去了的掌聲，張立基感謝觀眾並不善忘，他說：「《重口味》我係掹車邊，監製搵我想有高興結局，好似粵語長片搞場跳舞，佢話我咁耐冇返香港，不如完場跳《Electric Girl》，等多啲人見番我，勾起集體回憶。」
復出作電力四射
23年沒拍電影的他，再次站在水銀燈下，很珍惜這次機會，張立基說：「監製問我有冇興趣？我怕突然走場歌舞出嚟，會唔會奇怪咗啲？佢話冇所謂，我睇完套戲都覺幾得意，呢場戲拍咗一日，佢哋問咗我好多拍歌舞嘅細節，我提議咗少少，都係講咗一句對白，估唔到反應大家都：『嘩！』但個妝就白咗啲，我唔鍾意化妝，以前電視台係咁意掃吓，不過再拍番戲都幾好玩，我都同監製講，如果拍續集畀多幾句對白我。」
《Electric Girl》讓大家再記起張立基這個人，不知會否令他燃亮意志，鼓起勇氣再創第二次傳奇？張立基淡然說：「藝人係我鍾意嘅職業，今次返嚟香港為一啖氣，我都嘥咗十幾年，當時返大陸知名度冇咁高，兩年前返香港之後，好多朋友叫我出番嚟，我思前想後做咗咁多年，呢行唔係普通一份工，可遇不可求，我就嘗試吓盡力，始終自己40幾歲唔強求，我冇咗野心，後生都出過碟拍過戲，唔需要太可惜，𠵱家好多嘢放低，唔再執着。」
遇感情騙子自殺
前半生大起大落的張立基，事業方面雖然遇到一首好歌，可惜後勁不繼，愛情方面更加飽受挫折，跟葉玉卿的感情分手收場，之後碰上感情騙子被呃去數百萬積蓄，令他走上自殺絕路，手上仍留有割脈痕迹，重提舊事的他聲線低沉說：「我用咗十幾年先丟低陰影，有啲時間仲有歪念，覺得呢個世界好灰暗，其實呢個係心理病，我自殺過幾次但死唔去，試過割脈、跳樓、食50幾粒安眠藥，不過跳樓跳唔到，屋企人阻住咗，死唔去都啱，可能個天唔想我死。」
現在人到中年的張立基，患有坐骨神經痛，年尾可能要做手術，最近又發現心肌痛，懷疑心臟有事，他說：「我錢又搵過，又有一首金曲，呢生人無悔！𠵱家經濟唔會餓親，以前要買好多衫，𠵱家唔使買太多，冇嘢做咪上吓網同隻狗玩吓。」
激戰拍續集，但家輝話唔敢再變筋肉人？
到底練定唔練？即睇足本《亂噏24》，專訪張家輝、林超賢！
http://bit.ly/appletalk24