睇呢兩集《衝上雲霄II》，長嘅程度，比立法會拉布更甚。更令人覺得煩膠嘅係，呢120分鐘劇情，都係陳法拉所演嘅何年希向Sam哥無理取鬧，港女性格盡現。明明Sam哥憑其專業判斷知道何年希係唔適合做機師，先唔好講佢係咪鍾意淋雨攞嚟病又堅持要飛，妄顧乘客安全，單係佢嘅情緒化，五時花六時變成日吹無定向風，真係令人懷疑：何年希除咗有專業知識之外，佢真係適合做一個機師？
昨晚那集何年希向Sam哥無理取鬧部份，真係數不勝數。何年希參加評估試，係自己冒失犯錯，Sam哥話要寫report，但何年希質疑佢點解咁小事都要寫，於是Sam哥反問:「係咪要等出咗事先寫？出咗事邊個寫？」但何年希竟然覺得自己冇問題。
之前何年希問Sam哥呢個主考官，有冇out到人出局，Sam哥話:「邊個都好啦，我都係根據民航處嘅準則嚟做事。」所有嘢都有嚴格守則，但守則對何年希而言，係咪冇咩作用呢？
因為Sam哥認為Cool魔喺飛之前曾飲酒，唔適宜上機，何年希一返到屋企，又向Sam哥大興問罪之師、劈頭話Sam哥failed咗Cool魔，但冇話佢知。Sam哥反應係:「呢個係一件公事，我唔使刻意交代俾你知，係咪？」何年希反問:「你係唔想刻意講，定係你刻意唔講呀？」竟然以為Sam哥公私不分，更謂:「你唔同我解釋我會誤會0架!」於是兩個又嘈。Sam哥都話唔介意何年希去問Cool魔發生咩事，仲叫佢唔好將公事帶返家，以免公私不分，何年希成個彈起身、想返上樓，諗諗吓又唔忿氣，同Sam哥講:「咁我以後都唔講嘢，咁我哋就唔會鬧交喇!」仲好大力拍咗梳化一嘢，然後拂袖離去。
好喇，何年希淋雨跳開心舞整病咗自己，飛唔到，又遷怒Sam哥唔俾佢飛:「點解幫我call sick？我0依家冇事囉喎!」Sam哥都話保持身體健康係飛機師責任，跟住——何年希又發脾氣返上樓。
最令人睇到火都嚟，係Sam哥平心靜氣同何年希講佢唔適合做機師嗰幕。明明兩人只係離開酒店出去食飯，Sam哥好聲好氣問佢想去邊度食，但何就發老脾:「冇所謂喎，不嬲都係你話要飛左就飛左，飛右就飛右。」自己撩交嗌，但反過來話自己為咗遷就Sam哥，已經冇咗自己，又表示遷就佢遷就得好辛苦:「你係一個飛機師，我係你下屬，你永遠高高在上，我要就晒你，但你知唔知其實同你拍拖都係一樣，做你女朋友我都要聽你講…但我已經盡晒力去就你，你仲想我做乜嘢呀Sam？」Sam就話只係想佢做番自己，於是何年希就開始激動，漸變成歇斯底里:「我咁嘅性格即係唔適合做飛機師…」Sam哥解釋:「咁有啲嘢係唔適合就唔適合嘛。」何繼續激動:「OK，即係我唔適合做飛機師，亦都唔適合做你女朋友。」然後轉身離開。
點解《衝上I》阿Bell(陳慧珊)同Zoe(胡杏兒)與Sam哥相處時，冇呢個問題呢？阿Bell係有點執著同神經質，但唔係情緒化同歇斯底里。正如Sam哥曾受訪時都問過，點解編劇安排佢同何年希一齊？中間無甚舖排，欠說服力，今晚就咁睇兩集，網民已不停狂呼:「分手啦!」
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！