只看她的硬照，你以為她是𡃁模。「我影相唔代表我唔係魔術師，你估花樽易做㗎？」看過她的魔術表演影片，你發覺看她表演魔術可令人開懷大笑，但懷疑她是儍的。「我對儍的定義──我唔係儍，覺得呢個世界冇壞人嘅先係儍，我只係冇偶像包袱。」行有行規，要魔術師公開秘密是罪過，Miss Hunny唯一可以公開的，是觀看魔術的最佳樂趣是「坐定定有人娛樂你！」
撰文：王世欣
攝影：潘志恆
部份相片由受訪者提供
魔術高材生
成為魔術師之前，她17歲，讀中華聖潔會靈風中學，擁有一張會考full cert。在思考應否升讀中六陪狀元跑，發覺橫豎出國讀書，不如攻讀自己喜愛的魔術，睇吓自己是否高材生都好。於是她把自己的資料電郵給美國魔術學院Chavez Studio of Magic，「都唔知點解就收咗我做學生！」
一年課程，三萬港幣學費，七萬生活費，17歲女無人可靠就靠自己。一個人打幾份工，為儲錢全日只可食兩個雞尾包。接影相job，做侍應，教小朋友紙黏土穿珠仔，明明唔識，夠膽就得。但膽粗粗不代表無擔憂過，讀魔術不同讀會計，畢業後雖都是師，但在前途這條路上，魔術師冷門得多。阿婆這樣安撫她，「行行出狀元，做掃地都好，只要做到掃得最叻就得。當去個旅行囉！」萬事當去個旅行多無包袱，聽落真的頗安心。
心安之餘「最叻」二字亦銘記於心。Miss Hunny得到魔術學院老師的賞識與推薦，成了全球魔術師皆會去朝聖的荷里活魔法城堡Magic Castle內最年輕的女魔術師。
幾個月後，好運接踵而至，在一個農曆年初一，她收到一封大利是──魔術師劉謙看過她表演難度高，且較少女性學習的「手彩部門」魔術影片後，即邀請她到上海擔任魔術電視節目《奇迹之門》表演嘉賓。原來在魔術師這條冷門的路上，她真的是個高材生。
20歲賺第一桶金
《奇迹之門》在電視播放完畢之後更進行了全國巡迴表演。她只是20歲，就已經賺到第一桶金，「不過用晒嚟買道具同置裝！追求進步嘅魔術師永遠都係拎上一個表演嘅報酬去買下一個表演嘅道具。」其實全球魔術師都在用的Bicycle撲克牌，正版價值三十元一副，盜版五元已經買到。「一個好魔術師應該要有好嘅道具，所以我堅持用正版道具。用翻版會有失手嘅風險，我寧願買貴啲都唔想錯失任何一場表演。」
得着不只金，還有學校沒有教的道理。「《奇迹之門》教曉我表演魔術除了要帶出神奇之外，要自high先有感染力，更加要有娛樂性。」
自high很易理解，只需上YouTube看她的影片就會明。神奇是「睇魔術時會『嘩』一聲。」大陸人看表演時會發出市井卻強而有力的一聲「好！」日本人、韓國人都會表現興奮雀躍。但香港人看魔術的反應是「嗰度囉！睇過啦！」香港觀眾壓力太大，可能成日被老細鬧蠢過隻豬，所以一有位就要證明自己真係醒。
或者香港人非不懂睇表演應有的禮貌，而是無法用少陣腦，把懶醒當有趣。「將拆穿魔術當做炫耀自己智慧的手段好愚蠢。證明自己醒目有好多方法，呢種係最無禮貌嘅方法。」更無禮貌的人她也遇過，曾經有個藝員輕蔑地問：「魔術師識唔識飛啊？識唔識噴火？」或者對付無禮貌的人只能更無禮貌。「乜嘢都識，係唔識將你變紅囉。」
「找數」不如「走數」
完成大陸巡迴後，Miss Hunny開始與網絡紅人司徒夾帶合作拍攝魔術影片。為谷Like出噱頭「搵到一個魔術穿崩位Hunny就除一件衫找數」，穿崩位找到了，但她只是找了少少數，俗稱「走數」。不過，「找數」這回事的樂趣其實就是「走數」，找了數仲有咩好做呢？
常言道「認真就輸了」，在網上行走不得不以此為宗旨。最近她找了其中一條數，用老牛聲唱了《夏日熱辣辣》，不足一句鐘就有超過6,000個Like，「但負評極多，最正中我下懷的留言是把聲越聽越令人想檢舉！」司徒夾帶問她「你將呢個城市所有嘅癲佬都引晒出嚟，有冇少少慚愧？」訪問當日在海心公園進行，當真有個癲佬被她引了出來，圍繞我們大聲高歌千遍。
然而，她最癲的粉絲是在大陸巡迴期間遇上的一個90後女粉絲。追隨整個全國巡迴，甚至送她和助手商務機票。「佢話羨慕我明明都係90後但有能力靠自己，而佢就只可以用屋企錢。」所謂的瘋狂或者就是這樣，覺得對方叻，自己都想做到，但又唔去做。覺得魔術師神奇，但又不願相信魔術師也是師之一種，總要負評人，又何嘗不是相同心理？「破解魔術或者網上鬧我，講到底，都只係因為hit rate唔屬於你，鏡頭裏面唔係你。」
值得被尊重
魔術不能點石成金，也要成本。不會貿然要求會計師即席計盤數嚟睇吓，突然食食吓飯要魔術師表演個魔術其實也不合理。Miss Hunny很想要的，不過是任何職業都值得擁有的「尊重」。冷門的才能所承受之苦，只有同行會明吧？
我要她開個擇偶條件畀男粉絲，她說不要同行，最好對魔術冇興趣。「曾經有一任男友是同行，見到對方表演魔術上有不足地方我會出聲。但對方話自己心裏有數，而且寧願信其他前輩都唔信我。」歸根究柢似乎都唔關同行事，不過是太聰明罷了。「咁近城隍廟都唔求返支好籤，咁我無計啦！」然而夠自信，太聰明又有咩好怕？正如她手指尾長戴戒指，但這個戒指並非向熊黛林致敬，「通常電視鏡頭只會影住魔術師隻手，當見到隻戒指就知係我Miss Hunny表演緊魔術！」
Miss Hunny
1991年6月29日出生，香港全職魔術師，原名何穎璇。中五會考後，隻身到著名美國魔術學院Chavez Studio of Magic學習魔術，是首位畢業於該校之華人女魔術師。19歲獲台灣魔術師劉謙賞識，成為內地魔術電視節目《奇迹之門》表演者之一，及後進行全國巡迴表演。YouTube上的魔術表演影片單一hit rate達六十萬。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange