【隔牆對論】
2017年特首候選人如何誕生，社會由確保泛民能入閘，談到由300萬選民皆有權提名的「公民提名」方案。學民思潮拋出優先考慮公民提名的約章，但民主黨、工黨拒簽。
支持公民提名的民主黨主席劉慧卿認為，真普選聯盟學者團剛提出三個方案，還未深入討論，學民便要泛民傾向支持「第四方案」，令泛民動彈不得，也對學者無禮。學民思潮發言人黎汶洛認為，約章要打破1,200位權貴的提名權，但約章源頭是對民主黨的不信任，擔心該黨再次背棄選民。
記者：呂浩然 姚國雄
記：《蘋果》記者
劉：民主黨主席劉慧卿
真普選聯盟7月公佈三個普選特首方案，方案一是提名委員會參照現時1,200人選舉委員會模式，再加入其餘民選區議員，令提委會人數增至1,500人。方案二是將全港分成20區，各區直選出20人（共400人）成為提委會委員。方案三是全港區議員及立法會議員組成約500人的提委會。門檻方面，只要獲十分之一提委會成員支持就可入閘；方案一及三更加入公民提名機制，但凡獲2%或以上選民支持（約7至8萬人）也可成為候選人。
記：
你對學民思潮建議，由所有登記選民組成提名委員會的方案有何看法？
劉：
我唔係好知佢點樣運作，佢呢個係三個（真普聯方案）裏面冇嘅，但係我哋亦都唔會排斥佢，大家咪攞埋一齊傾囉，如果大家有機會坐低，就聽一聽佢嗰個係點樣操作。如果照學者嘅第二個方案，就係畀大家選（提名委員）出嚟，都係選番400人，跟住攞到呢400人嘅百分之十就可以，呢個我就易明啲。
記：
如何比較學民方案和「雙軌制」（即政黨提名和公民聯署提名並行）？
劉：
我相信社會未有深入討論，我希望過程當中好多意見表達出嚟，令大家搵到一啲方法係市民好易明白亦都係可以操作嘅。你睇學者嘅第一個方案，係比較接近𠵱家嗰個選舉委員會，佢都講到明當佢有1,200人，然後加多幾百個區議員變咗大約1,500人，提名門檻就百分之十。如果唔係就攞公民提名，公民提名就係登記選民嘅百分之二，大約7萬個。
市民最大憂慮係提名委員會會俾北京操控，第日又唔知點樣以民主程序去推選啲人，佢可能就會篩選某啲人，令到有啲人冇得參選，可能嗰啲人係好有民望、好得到市民支持。無論用方案一、方案三去做，可能佢（北京）都有方法去操控，所以就要畀條生路（公民提名）佢。
記：
有指雙軌制較有利於政黨，因此民主黨才力推，你如何回應？
劉：
淨係整個提名委員會係全世界都冇，但係你畀政黨、議員去提名係有地方有喎，咁點解要排斥咗呢個方法呢？真係搞到我哋舉世無雙咁呀？我哋𠵱家講係選行政長官，我哋唔係淨係選一個人，我哋係要選一個人出嚟組成政府，所以如果你話有個大黨或者有個大嘅團體支持嗰啲候選人，大家一齊合作，呢個差不多係必要嘅㖭。
如果你話冇嘅，我係一個人自己出嚟，咁我相信你都幾難叫市民好嚴肅咁樣去對待你參選，因為選咗你出嚟，咁你點樣治港？你同邊個一齊去做？啲市民會問喎。如果你話個提名方法係畀啲有組織嘅，點解咁出奇？如果你嘅提名方法淨係畀啲散兵游勇，我相信市民都覺得「唔係啩？」
記：
為甚麼民主黨不簽署學民的約章？如何看待學民的做法？
劉：
我哋係尊重佢（學民）。就係因為個約章要佢哋（個方案）優先，學者提咗三個建議出嚟，我哋都未曾去討論，佢就冇端端整咗第四個建議叫你簽、約束你，話嗰個優先，原本嗰三個都未傾你就丟埋一邊，我唔覺得呢個係對啲學者好有禮貌，我都唔明點解會咁樣做法。
記：
今次政改民主黨的底線是甚麼？會否再與中聯辦談判？若會，如何談判？
劉：
如果唔係普及而平等，民主黨係唔會支持，但係咪冇公民提名就一定唔係普及而平等呢，我相信亦都唔係，咁多國家雖然有地方係有公民提名，但好多都冇，咁點解人哋又有普及而平等嘅選舉？
其實《基本法》都寫咗中央嘅角色，唔係話佢冇角色，一講就係干預香港事務，但係我唔覺得佢一開波就應該搞，所以應該特區政府去處理、去提出方案、去同市民傾，凝聚共識，希望搞得好掂嘅時候中央都唔使介入。所以最終係咪要同佢傾，咪睇吓民主黨同埋民主派大家點樣商議，而如果其他政黨都覺得基於乜嘢原因都好，係唔應該去嘅，咁我哋自己衝出嚟話去咪好怪囉。
mailto:[email protected]
激戰拍續集，但家輝話唔敢再變筋肉人？
到底練定唔練？即睇足本《亂噏24》，專訪張家輝、林超賢！
http://bit.ly/appletalk24