公關S校友聽校友會午餐演講，聽校長L與T博士講本地家長為子女選擇學校，要高度注意培養子女之中文能力，如入讀國際或英基學校，更要想方法補習中文。公關S深感其說，佢話在中環碰到搵工之年青人，不少來自海外學校或本地國際學校，英文唔知幾醒，香港商界其實不乏英文人才，但弊在好多年青人中文唔掂，讀寫都唔得，一叫佢地中譯英或英譯中，就顯得詞不達意，掌握中文不了，佢間公關公司常為此頭痛。在香港搵工，只精通英文一瓣，競爭力就差好多咯，譬如金融，香港有乜本土大生意呀，唔飛上北方訪客，生意會自天跌落嚟咩？上北方，就要熟悉中文啦。
吃過飯，自金鐘步行回中環，希望減少啲卡路里熱量，雖不致減肥，亦希望不增肥，更希望唔好體內血糖過高。一位親戚因染上糖尿病多年，最近身體不適送入瑪麗醫院ICU急救，好彩醫生醫術高明，三日後可以出院，去睇專科醫生，始知患上腎病，急都急唔嚟，要慢慢醫，我地聽到，梗係要肉緊啲注意健康啦。最近中文大學出版社出版一本新書《腎延敏行》，作者有三位，分別係李錦滔醫生，周啟明醫生及羅民貞護士。新書有食衞局局長高永文，醫管局主席胡定旭，醫管局總裁梁柏賢分別寫序言，可見重視。據介紹，李醫生行醫三十年，現為威爾斯親王醫院內科顧問醫生及腎科主管、醫管局中央腎科統籌委員會主席、中大榮譽內科教授，在2012年獲得美國國家腎臟基金會頒授「國際傑出成就獎章」，難怪胡定旭話佢係國際享負盛名的腎科權威。周啟明醫生係威爾斯內科副顧問醫生、中大名譽臨床副教授，連續三年得「中大醫學院全年最佳教師獎」，羅民貞女士就係新界東醫院聯網腎科顧問護師。三位專家寫腎科知識用書，文字淺白，採用彩色漫畫插圖，加插病人心聲（如中大哲學系陶國璋博士），普通人一睇就便懂，內分15章，由腎臟功能，慢性腎病，糖尿病患者講到常用藥物，日常飲食，及有用資料，十分適宜病人、病人家人閱讀，其他人讀之亦有得益，起碼知道在日常食物方面，點樣選擇，李醫生話香港慢性腎病患者估計有八十萬人，其中46%源於糖尿，可見防範糖尿病之重要，作為醫學常識書，本書不可不讀。