要組成班霸級球隊，冇錢真係萬萬不能，不過有時有錢都唔係大晒。好似英超富豪球隊曼城因為中堅荒，轉會市場關閉前嗱嗱臨簽入阿根廷中堅迪米捷利斯，點知佢齋練波就傷咗，領隊比歷連尼又要頭痛過嘞！
加盟4日即唞6周
曼城有中東大水喉支持，轉會窗關閉前用350萬鎊（約4,230萬港元）收購32歲、喺7月先免費轉投馬德里體育會嘅迪米捷利斯返嚟，價錢簡直濕濕碎。不過，呢位後防救星未落場又受傷，話說佢周四跟隨球隊日常練習，整傷膝部韌帶，加盟球隊4日就傷出。雖然佢唔使做手術，但要休息6個星期，10月尾先可以復出；到時隊長高柏尼應該已經好番，所以買迪米捷利斯都解決唔到中堅荒。
「藍月亮」𠵱家除咗迪米捷利斯，中堅傷兵仲有高柏尼同米卡李察士，得番尼史葛同拿斯達錫兩位正規中堅可用。而拿斯達錫、高拉洛夫等，呢個星期更加要代表國家隊踢世盃外圍賽；所以比歷連尼求神拜佛，都希望唔好再添傷兵，事關9月中開始就要兼顧英超同歐聯。
艾簡着高科技鞋療傷
德國醫療技術喺歐洲水準，都算得上一流，迪米捷利斯喺03至10年間效力德甲班霸拜仁慕尼黑，唔知佢又會唔會向舊會軍醫求助呢？事關拜仁軍醫水平一流，佢哋為咗治療西班牙中場堤亞高艾簡達拿，用咗一種名為VACOped嘅高科技特製鞋畀艾簡達拿着。據報呢種特製物料，比石膏更加穩定，拆除清洗亦都好方便，仲可以加快康復時間；之前奧地利國腳阿拉巴都用過。曼城咁有錢，畀少少錢加強軍醫設備，好過買埋一堆唔等使嘅球員啦！
激戰拍續集，但家輝話唔敢再變筋肉人？
到底練定唔練？即睇足本《亂噏24》，專訪張家輝、林超賢！
http://bit.ly/appletalk24