【隔牆對論】
記：《蘋果》記者
黎：學民思潮發言人黎汶洛
學民思潮早前向泛民政黨發信，邀請他們簽署《全民提名聯署約章》，指出公民提名是爭取普選最優先條件，並提出取得10萬選民提名者，即可成為特首候選人，惟民主黨和工黨拒簽；簽署約章的政黨包括公民黨、人民力量、社民連、新民主同盟及街工。
記：
泛民政黨全部也支持公民提名，為何學民思潮要求泛民白紙黑字簽約章？
黎：
之前有報章訪問過何俊仁，佢提出一個公民間接提名，報道出咗街，當晚真普聯嘅會議好多政黨都覺得何俊仁嘅說話係唔啱，甚至乎提出批評。（何在該訪問強調，最重要是確保泛民入閘選特首，公民提名非最重要）
有見及此，學民思潮提出全民嘅約章，唔希望啲政黨口講就算，希望簽番個承諾，希望佢哋負責任。為公平起見，加上泛民唔係只有民主黨，如果有政黨唔簽約章，清晰講出嚟，唔好一拖再拖，之後演變至我哋分裂泛民。
記：
這是否可演繹為學民思潮發起聯署，是因為民主黨在2010年支持了政改方案，學民不再信任民主黨？
黎：
係有少少呢個原因。因為我哋希望泛民政黨投票立場要堅定，唔好因為「利益」，例如阿爺接受你（民主黨）嘅方案，你覺得OK，然後你三日後臨時急轉變立場。無論係佔中或政改方案，我哋都唔希望有政黨三日內投票立場突然轉變，希望泛民睇清楚簽咗嘅約章；工黨已有計劃簽約章，但會提出備註。
記：
公民黨余若薇也說，可以與中央閉門談政改，公民提名不是底線，為何學民不覺得她的言論有問題？
黎：
余若薇話佢會同唔同政黨、團體交流，包括中聯辦，佢講過，見面唔係代表政府成功箍票，唔會因為見完面，啲票就畀晒佢，唔係立場轉變。
記：
有人批評，學民思潮要求其他泛民簽約章，是逼人上轎、站在道德高地，客觀效果令泛民分裂，你是否同意？
黎：
學民思潮俾人批評當然唔好受，但我哋原意唔係分裂泛民，亦唔係挑釁政黨，如果泛民主派議員立場堅定，佢好難轉身。如果政黨同意個約章，咪簽囉；唔同意，咪唔好簽，你自己向支持者解說就可以，話番畀支持者聽，要個字眼點改你先會簽。
我哋覺得有少少冤枉，好似學民思潮被打造成係人民力量、社民連嘅B隊，我哋都頴晒頭，我哋唔係一嚟就鬧人。我哋未來一年會多啲同市民解釋，同政黨多啲溝通，去說服佢哋。
記：
真普聯三個方案仍在諮詢中，如今要他們簽約章，以學民思潮第四個方案為優先，學民是否以己為尊？
黎：
如果學民思潮冇拋出第四個方案，係咪等同市民只可接受學者嘅三個方案呢？如果你唔接受學民方案，影響到你個黨嘅利益，咁你咪唔好簽囉。再有其他方案嘅話，我覺得應該交畀電子公投去決定。如果話學民對學者唔禮貌，得失咗佢哋，我只可以話，我哋繼續同佢哋討論，希望唔好影響交流。我唔擔心呢份約章妖魔化咗部份泛民議員。如果政黨旗幟鮮明，難以俾人扭曲。
記：
學民的公民提名方案，具體如何操作？學民是否接受雙軌制，即公民提名以及民選代表提名候選人呢？如果電子公投結果，市民支持了沒有公民提名的方案，學民思潮是否願意屈從民意？
黎：
我哋建議由全港300幾萬名選民，組成2017年特首提名委員會，獲得10萬人提名便可參選特首。人數多少，可再討論。現時1,200人的選舉委員會，點處理就再討論，但如果有公民提名，呢個委員會屆時有乜嘢存在意義呢？係咪已經名存實亡？
我哋仲討論緊雙軌制，如果市民認為可以接受，學民會員認為OK，日後我哋可以修改（立場）。如果到時個電子公投結果，我哋衰到貼地，學民嘅立場會交畀會員大會決定。但電子公投有可能俾黑客入侵，認受性係咪高呢？到時係咪需要重新再搞呢？
mailto:[email protected]
激戰拍續集，但家輝話唔敢再變筋肉人？
到底練定唔練？即睇足本《亂噏24》，專訪張家輝、林超賢！
http://bit.ly/appletalk24