環球數碼創意（8271）市值5.5億銀，係首鋼集團唯一媒體創意旗艦，遲早實俾阿媽湊大。集團預期PE平到得6倍，翻一番都仲未有耐上到創業板指數36倍PE水位。
環球數碼主打電腦創作及製作（包括呢期好hit嘅3D動畫製作及創作），仲有電腦圖像培訓業務。集團03年1蚊上市，07年最高見過3.7元，現價0.36元跌剩番一成。
但咪睇環球數碼股價細細粒冇料到，對上控股公司，係長實（001）李超人都有揸住嘅首長四方（持有環球創意40.78%），終極對口單位，就係鼎鼎大名嘅首鋼集團。而早喺07年，首鋼講明會透過集團發展鋼鐵業以外業務。
咁睇，喺外國，大家熟悉兼發展成熟嘅「夢工場動畫」，市值高達186億港銀，環球數碼市值就得5億銀咁大把！
集團有咁雄厚嘅股東背景，加埋電腦創作大行其道，祖國電影市場又吃香，食住呢條水，遲早俾控股湊大，而且更加事半功倍。
博翻一番見0.72元
環球數碼今年上半年，虧轉盈近1,700萬銀。集團原創3D動畫電影《潛艇總動員III》勁成功，暫結到6月底，累積票房已經超過5,500萬人仔，兼創下投放拷貝數量及發行紀錄最多嘅動畫電影紀錄。而嚟緊嘅日子，集團仲有兩部2D同3D動畫電影，繼續肥仔水。
唔好估多，環球數碼全年純利7,750萬銀，係咁易增長近30%，預期PE跌到得番6倍。趁集團呢期交投變熱，買入博翻一番到0.72元，PE不過12倍，未有耐追到創業板指數36倍PE，及好似上邊夢工場近40倍PE水位。
錢雋
細價股專家
本欄逢周二、五刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange