財經演員大家早幾年見得多，尤其係個股市旺時，財演們日日畀冧巴，推邊隻邊隻「輪」，又幫手分析不同行業「板塊」前景點好點好，幫手吹波引散戶落叠，總之就似模似樣。但𠵱家股市樓市呆滯，冇上冇落，財演們搵食唔容易。
但另一個新興政治演員就吃香囉，而且仲大把世界。好以「幫黨出聲」，周融七情上面赤膊上陣，以愛港力劇本，串演反佔中急先鋒，勝在寸嘴唔怕面懵，亂噏當秘笈。至於科大雷鼎鳴，也赤膊上陣做政治演員，唔知點解一旦去到台前，都變成演技浮誇。最新加入政演行列，當然是歌星GEM，用超低能政治白癡形象去為梁振英打氣，引來網民圍攻，比上一round王菀之及高皓正引起反響更大。
要有時事常識 忌亂噏
通街維穩費，做政演比財演前景好，但政演水平低，應參考財演方法演技。財演們至少講起內地石油板塊前景，頭頭是道，一般水平觀眾也不敢挑機，除非閣下也是金融界出身，才睇通財演技法。但政演一味取悅老細，演技浮誇，作小學雞式口舌之爭，例如我正你邪，佔中三子唔係正教授等。根本問題係政演冇畀心機搞好劇本，同港產片走下坡原因一樣，政演們沾染咗爛劇本現場執生飛紙仔等娛圈壞習慣。
政治角力首重論述，如果GEM要撐梁，絕冇問題，但唔該幕後人士幫佢寫好論據。「我想跟梁振英說句『加油』呀！他的壓力必然好大。先不要考慮他做每一個決定背後的原因，不要去judge他做得好不好，我真是好想跟他說一聲『加油』，因為這個角色實在很難做。我不想再對他施加壓力，想給他一份鼓勵。」𠵱家市民就係認為佢上任一年來做得差先叫佢下台，你就話唔好去judge佢做得好唔好，但又為佢打氣。一個好辛勤工作游說GEM小姐買倫敦金騙徒，係咪唔好judge佢是否做壞事，又叫佢加油呢？
政演要求其實比財演更加高，金融知識較專門，而政治只係講求common sense，合乎常識。今日90後對時事常識有一定認識，聽到GEM呢種扮天真撐建制言論，只會嗤之以鼻。大教授、大公關、大偶像們總會以為政治論述好易噏，有口就識講，咁就一定出事。
政治同財經一樣，都係專業，做得政治演員，唔該拿出專業精神，鬥好劇本先至好出台，否則講錯一句，連本行也受波及。GEM要做年輕人偶像，專心唱好歌吧，政治，好危險㗎！
添馬男
激戰拍續集，但家輝話唔敢再變筋肉人？
到底練定唔練？即睇足本《亂噏24》，專訪張家輝、林超賢！
http://bit.ly/appletalk24