美國押後攻打敍利亞，投資者神經冇咁繃緊，個市唔算chok，但電訊業消息多籮籮，迴響最大嘅，當然係諾基亞賤賣手機業務畀微軟，一代霸王落得如此下場，正如廣告話齋，「無論係幾鋒利嘅刀，都會有生銹嘅一日」。
好明顯，諾基亞死因係轉身慢，多年來靠賣傳統手機過活，喺智能手機市場大落後，結果鑄成大錯。自從蘋果已故教主喬布斯推動手機業基因改造，07年推出嘅iPhone功能多多，贏盡市場掌聲，令智能手機這條魚越養越肥，家陣已成為手機市場嘅大石斑，利錢豐厚。
當年三星等手機廠已聞到辳味，知道傳統手機呢條泥鯭時日無多，開始鑽研養石斑之法，結果成功過渡，但諾基亞就一味食老本，靠開拓新興市場賣傳統手機，話就話係全球第二大手機商，但啲泥鯭根本賺唔到錢，收檔係遲早嘅事。
薩默斯掌儲局 債市高危
講番個市，美國今日公佈8月就業報告，係聯儲局本月18日議息前，最重要嘅參考數據，市場普遍預期，除非數據奇差，否則儲局主席伯南克應該會㩒掣退市，縮細每月850億美元嘅買債規模，加上儲局地區經濟報告褐皮書話，美國經濟持續溫和擴張，美國10年期國債孳息噚日已升到2.95厘逾兩年新高，照睇應該好快見3厘。
由於美國同日本嘅國債孳息差距又拉闊番，加埋日本央行考慮加碼量化寬鬆，以配合政府嘅加稅政策，美元兌日圓噚日抽番上100算，但歐洲經濟近期續有起色，美元兌歐元同英鎊就維持近期嘅上落市格局，歐元在1.31至1.33美元徘徊，英鎊則處於1.54至1.56美元之間。
雖然儲局接班人選未定，但觀乎美國傳媒報道，總統奧巴馬懶理外界反對聲音，對前財長薩默斯情有獨鍾，盛傳白宮開始為佢做緊職前審查，而另一熱門、儲局副主席耶倫亦同心腹講大勢已去，儲局下屆邊個揸旗已呼之欲出。
𠵱家有越來越多評論擔心，奧巴馬嘅重口味可能禍及全世界，事關儲局主席係控制美國金融政策的大腦，一言一語都隨時影響環球金融市場。大家𠵱家好擔心嘅係，一旦薩默斯成功就任，而現任副主席耶倫亦掛冠而去，向來以口不擇言嘅薩默斯若急於退市，美國以至環球債市隨時俾佢推冧，有分析甚至擔心佢接掌聯儲局主席一職，隨時會搞到金融市場大亂，變成黑天鵝事件。
吼位開澳元交叉盤淡倉
喺未來兩個禮拜，環球市場將面對美國攻打敍利亞、儲局議息及德國國會大選等隱憂，屆時資金或流入日圓及瑞郎避險，建議可於澳元兌日圓升至92水平開淡倉，中線睇89日圓。
奇兵
本欄逢周五刊登
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange