如果8月底同大家講，9月第一個禮拜恒指可以爆升千點，實俾人話黐線，但個市就係要黐畀你睇。港股噚日再升271點，收市創近三個月高，四日累升866點，早排沽空率急升嘅匯控（005）同中移動（941），噚日分別挾高2%及1.3%，相信淡友已開始投降。美國今晚會公佈就業數據，結果將會左右儲局嘅退市決定，加上指數再度進入重倉蟹貨區，預期大市整固一下都好正常。
大市偏強，個股亦百花齊放，波羅的海乾散貨指數創年半以來新高，航運股全線起錨，反映一個半個好消息，已足以成為升市催化劑。噚日新地（016）以217.7億人仔，投得上海徐家匯地皮，較底價高出24%之餘，更成為新一代地王，再配合金九銀十來臨，內房股好大機會成為下一輪資金炒作板塊，買定等炒有着數。其中綠城中國（3900）負債率低兼賣樓成績佳，值得考慮。
綠城公佈首七個月銷售額339億人仔，佔全年目標逾六成，進度良好，下半年乃傳統旺季，理應順利達標，最新淨負債率由71.9%進一步回落至69.1%，遇有內地水緊消息，抗跌力也較強。戰友可候15元樓下吸納，一旦資金重新追捧內房股，要贏一成難度不大。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange