【亂噏24】《激戰》跟很多電影一樣，也安排了幾場優先場試水溫，觀眾反應都是正面。林超賢憶起當年好像沒有首映禮這回事，蔡瀾說：「首映就係午夜場，有啲導演緊張到流晒冷汗！」家輝問：「咁有冇啲導演啲戲唔好，拍完出嚟散場俾人打？」蔡瀾睩大雙眼：「××聲㗎！打就冇，𠝹椅就有！」當年午夜場是江湖人士雲集之地，戲院內煙霧瀰漫，電影好與壞，單憑觀眾的「身體語言」便能反映。
隨時回歸拍劇
近年也興起導演、演員親臨戲院謝票，林超賢說：「我同家輝都做過件咁嘅事，對台前幕後嚟講，係一個好大嘅滿足感。」家輝笑說拍了好電影才值得去謝票，似是暗寸某些電影人以謝票來催谷票房。
家輝當年亞視出身，無疑拍電視劇是他鍛煉演技的平台，可以讓他嘗試不同方式去演戲：「試十年，畀錢你試喎！」不過近年他矢志於電影業發展，已沒有再拍劇，當年盛傳他參演無綫劇集《天與地》，惜最終亦未能成事。家輝說：「電視劇要講嗰種方式，我可能唔太習慣到。第二就係劇本題材會受好大限制，咁如果我仲係發掘緊我想試嘅嘢嘅時候，喺電視裏面，我諗應該搵唔番想要嘅嘢。」不過他認為拍劇仍然有樂趣，尤其一大班人在canteen食飯吹水，是另一種開心生活。言下之意，家輝亦有可能回歸拍劇。
家輝總予人「大器晚成」的錯覺，連他自己也感到不解：「成日將我擺喺一個捱得好辛苦嘅位置上面，有邊個唔係咁捱箒大佬？我覺得自己其實都幾幸運，一路都喺大公司庇護下去拍。可能大家覺得張家輝咁努力，點解都好似時不我與咁呢？喂，又有幾多人成日都咁幸運，成日可以順意㗎？」說起鍛煉，肥佬黎講到台灣名嘴豬哥亮的事迹：「有日同豬哥亮食晏，我話你同其他老一啲嘅主持，點解執生得咁勁？佢話好簡單，佢喺牛肉場出嚟，現場日日對住下面啲觀眾，我睇佢眼神、表情一路去執生。𠵱家嗰啲主持，冇機會鍛煉自己。」他認為家輝有今天成就，在電視台的磨練很重要，家輝亦感激亞視的栽培。
教女切勿比較
家輝能夠看得通透，因他明白跟人比較是多餘，最重要還是今日的我突破昨日的我：「個女講，爸爸你有冇錢？我話嗱，你睇吓你同乜人比較，你同嗰個比我就好窮，你同嗰個比，我都幾有錢㗎！比較永遠都係一個致命傷，唔通吓吓話大隻過阿諾舒華辛力加咩？又要比較邊個邊個嘅戲，你問吓自己先，自己有冇進步到，有冇突破到先？」贏得全場拍掌。肥佬黎總結：「我覺得如果咁你都唔成功，天冇眼！」
激戰拍續集，但家輝話唔敢再變筋肉人？
到底練定唔練？即睇足本《亂噏24》，專訪張家輝、林超賢！
http://bit.ly/appletalk24