又到國際賽期，以前每逢呢啲日子，總會聽到香港隊展開賽前練習期間唔齊人，或者有球員稱傷退隊，難得今次友賽作客緬甸好齊人，連外流兵好似陳七都有歸隊，希望香港可以持續復蘇。
其實唔單止香港，世界各國國家隊教練都要面對「幾時齊人」呢個困難，英格蘭國家隊好似人才濟濟，不過臨近比賽期又總會有球員因傷退隊，鶴臣又要搞一大輪補選，難免影響部署。戰友咖喱講到一支球會喺國家隊獨大嘅好處，骨幹球員間有基本默契，就算賽前集訓時間少，都起碼冇合作性問題。
不過國家隊風格畀單一球隊牽住走未必係好事；德國國家隊基本上同拜仁不可分割，雖然隨住多蒙特冒起，加上小豬、馬里奧葛斯等因傷缺陣，今次德國大軍只有5名拜仁兵，好似唔算獨大，但其實德國仍然流露好重拜仁味。歐洲職業球隊主要對手，一般來自本土聯賽，如果參加歐洲賽，都叫做同其他國家交手，但大體上風格唔會變化太大，但國家隊賽事，如果去到世界盃呢個大型賽事，面對各大洲球隊，風格差別就大得多，非洲體力化，南美就技術型，往往國家隊教練就要多幾套應付戰術，但如果麾下球員都係熟口熟面，要變招嘅能力就好有限。
而且一支球隊就算幾強，都總有高低起跌，國家隊太依賴單一「工廠」，亦都唔係好事。不過點都好，德國𠵱家靠拜仁兵，出線世盃形勢大好，亦都係下年決賽周熱門之一，或者哥迪奧拿嘅西班牙化，令德國開創另一個紀元。文：牽牛
激戰拍續集，但家輝話唔敢再變筋肉人？
到底練定唔練？即睇足本《亂噏24》，專訪張家輝、林超賢！
http://bit.ly/appletalk24