馮仁昭四圍超:朱玲玲爆晶晶餵人奶瘦晒 - 馮仁昭

馮仁昭四圍超:
朱玲玲爆晶晶餵人奶瘦晒 - 馮仁昭

榮升「最美麗嫲嫲」嘅朱玲玲噚日同歷屆港姐向海嵐、劉倩婷、王愛倫、莫可欣等到又一城出席「TES2013德國創遊樂」頒獎禮,平時朱玲玲熱愛影相,佢話幫乖孫影相時特別冧,唔知會唔會幫孫仔出相集呢?佢笑笑口話:「BB成日瞓覺,好多相都係瞌埋眼。但如果出相集,啟剛一定第一個反對,因為佢唔想BB相喺網上流傳,覺得都係私人啲好。」

唔急飲新抱茶

朱玲玲話BB未必會跟族譜改名,暫時都係叫Baby,佢透露郭晶晶餵人奶,所以瘦得好快,朱玲玲話:「Baby好似媽咪,啟剛做咗人爸爸後有責任感咗好多,好多事都好緊張,我老嘞,個個都大。」
話晒係霍家第一粒孫,唔知百日宴會唔會大搞?朱玲玲話:「未決定,上次搞結婚太辛苦,好多工夫,所以都未必會。」佢亦唔心急再飲新抱茶,話啟山同啟人𠵱家要專注事業。

霍啟剛同郭晶晶嘅愛情結晶品仲未改名,而霍家亦仲未決定會否擺百日宴。資料圖片

歷屆港姐(左起)向海嵐、王愛倫同莫可欣噚日出席頒獎禮活動。

另外,啱啱同老公李丞責去完意大利、英國旅行返港嘅劉倩婷,被問有冇留意出爐港姐冠軍陳凱琳講一人一票選港姐,伸延嘅政治風波?佢話唔太清楚,但就好贊同曾志偉話港姐唔應該參與太多政治話題,問係咪俾新聞部擺上枱,佢就話:「唔係,當年我選完都有接受新聞部訪問,點答係一個方式,都唔一定要畀個人意見。」不過佢都好開心今屆冠軍同自己一樣生得咁嬌小,令佢有個伴。
撰文:馮仁昭

激戰拍續集,但家輝話唔敢再變筋肉人?
到底練定唔練?即睇足本《亂噏24》,專訪張家輝、林超賢!
http://bit.ly/appletalk24