盛女周麗淇（Niki）同鄭嘉穎分手五年，之後曾同紗廠太子爺Eric傳緋聞，可惜都係分手收場，不過馮仁昭收到風，Niki早排喺橫店為now拍劇集《大漢賢后衛子夫》，撻着28歲嘅同劇演員徐正曦，Niki雖然比男友大六年，但唔介意發展姊弟戀，仲已經開始咗兩個月。
聽講徐正曦對Niki呵護備至，徐正曦係江若琳師弟，𠵱家喺內地發展唔錯，每集劇酬有20幾萬人仔，所以Niki豁出去嘗試姊弟戀，日前Niki牛一俾雜誌影到同男友喺半島酒店開房慶祝，本周日徐正曦仲去咗Niki貝沙灣香閨過夜。噚日Niki經理人話：「藝人私事唔回應，如果係真就祝福佢，希望傳媒畀空間佢哋發展。」徐正曦噚日透過經理人回應：「我哋係好朋友，一切順其自然。」
陸詩韻四年情玩完
相反，05年港姐亞軍陸詩韻嘅情路就好坎坷，舊年俾人影到同男人去汶萊，佢解釋嗰個係未婚夫吳銘偉，之後傳佢未婚夫生意失敗欠債幾百萬，婚事又擱置。噚日陸詩韻突然喺微博自爆分手：「現在的我享受單身的生活，畢竟這四年來雙方亦為這段感情付出過。」下晝四點幾，佢再留言：「過去的四年只有一位未婚夫，雖然已成過去，但大家依然關心和尊重對方。」馮仁昭打畀陸詩韻，但電話飛咗去留言信箱。
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！