【佐敦】余文樂同韓星池珍熙、崔始源及尹真伊合演嘅電影《大峽谷》，前晚11點幾喺佐敦街頭上演警匪槍戰戲份，身穿避彈衣扮刑警嘅余文樂，連同多位突擊隊員攻入時鐘酒店停車場，同匪徒連開多槍駁火，震耳欲聾，余文樂都被槍聲嚇咗一跳。
尹真伊晒靚腿
崔始源同池珍熙西裝骨骨現身，喺韓劇《紳士的品格》演出嘅尹真伊着熱褲上陣，尹真伊圍讀後自己坐埋一邊努力唸對白，似乎同前輩池珍熙合作好緊張。有份演出嘅Janice Man雖然前晚未有戲份，但都帶糖水嚟探班，非常識做，至於張學友就陪咗13歲大女瑤華去倫敦升學，遲啲先返劇組交人。
由於連場駁火十分刺激，吸引大批途人圍觀，有男女途人睇到㷫烚烚，竟當眾啜嘴慾火街頭。不過，噚日本報收到讀者投訴，指劇組於噚日凌晨4、5點拍槍火戲發出連環巨響，擾人清夢，甚至嚇醒小朋友喎。
採訪：張俊銘
攝影：黃文偉
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24