無綫賀歲檔期一向收視一般，不過新年流流，總要播啲令觀眾開心嘅劇集，而今年擔此大任做炮灰嘅係薛家燕、湯盈盈同滕麗名，佢哋會拍關永忠監製嘅15集賀歲劇《新抱喜相逢》。
無懼變炮灰
呢套時裝喜劇，講述盈盈同阿滕本來係藝員訓練班嘅好姊妹兼好同學，後來演變到由娛樂圈鬥到入豪門，佢哋分別嫁畀敖嘉年同麥長青兩兄弟，遇着薛家燕呢個奄尖奶奶，鬥出唔少笑料。計起嚟，家燕姐都好耐冇拍拿手喜劇，劇中嘅老公仲要係「舊相好」于洋，佢哋繼經典處境劇《真情》後再續前緣，加上《新》劇係盈盈產後復出第一個劇，真係令人好期待囉。
講起新劇內容，兩位女主角由娛樂圈鬥入豪門，好容易令人諗起陳法拉同諸葛紫岐，雖然早前法拉已經宣佈同Neway太子爺薛世恒和平分手，但佢之前同諸葛嘅大鬥法確係經典，不過監製關永忠否認有影射之嫌，佢喺電話度話：「冇諗起過佢哋，所以絕對冇影射成份。豪門同娛樂圈嘅新聞一向最多話題，最吸引觀眾。」至於農曆年係炮灰檔，關永忠就話唔驚：「以往都有啲賀歲劇收得唔錯，最緊要過年時有套劇，令觀眾睇得開開心心。」
版主：陳基征
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24