今夏球員轉會窗喺周一關門大吉，要到明年1月先開番。曼聯雖則喺臨尾嗰日簽到心頭好費蘭尼，但都俾英國傳媒評為輸家。點解？因為紅魔新帥莫耶斯漁翁撒網，但想簽嗰個就衰嗰個，累球隊取代阿仙奴成為「險簽王」，據聞高層對佢好不滿。
阿仙奴之前斟希古恩、蘇亞雷斯、朗尼同賓施馬都衰咗，一度俾人笑係險簽王，但領隊雲格臨尾執番法米尼、維維安奴同埋奧斯爾，其中奧斯爾仲係德國國家隊主力，相信廠迷都收貨。相反曼聯領隊莫耶斯就失威得多，佢想簽嘅幾乎全部衰晒。今夏紅魔睇中嘅球星名單水蛇春咁長，包括巴尼斯、法比加斯、堤亞高艾簡達拿、迪羅斯、莫迪歷、奧斯爾、基迪拉、史奈達、安達靴里拉同法比奧干查奧等，但唔係對面球會唔肯賣，就係個球星唔願嚟，搞到莫耶斯勁冇面。
好彩費蘭尼講心唔講金
基迪拉就證實曼聯開3,400萬鎊簽佢：「皇馬拒絕咗曼聯，件事就係咁囉。」加拉塔沙雷亦表示曼聯斟過史奈達：「曼聯兩個禮拜前，好間接咁提出收購史奈達，但我哋冇應承。」雖然莫耶斯成功喺前球會愛華頓簽入費蘭尼，但據聞係費蘭尼願意犧牲喺拖肥糖嘅400萬鎊忠誠獎金，曼聯先至能夠以2,750萬鎊買到佢；而愛華頓就否認有咁嘅事。
另外，佢哋喺收購安達靴里拉一事上俾3個騙子整蠱，扮係佢哋代表去同畢爾包傾；而英傳媒話單嘢唔係惡搞，只係雙方傾唔掂，曼聯先至即刻同嗰3個人劃清界線。據講曼聯會喺明年1月再斟安達靴里拉同埋巴尼斯。
尹佩斯不滿訓練方法
紅魔最終只係簽到費蘭尼一個大牌球星，聽聞新任行政總監活華特同莫耶斯要齊齊孭鑊，俾曼聯啲老細捉去照肺。莫耶斯除咗愁簽唔到球星之外，亦煩緊點同尹佩斯搞番好啲關係；消息指，尹佩斯好唔滿意佢嘅訓練方法，仲表明好掛住已退休嘅費格遜，認為費Sir先至有料。家陣莫耶斯又簽唔到球星，又搞唔掂尹佩斯，睇嚟要向費Sir求救至得嘞。
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24