【九龍塘】陳慧琳（Kelly）嘅4歲大仔劉昇（蝦餃仔）噚日幼稚園K2開學，下晝兩點半，Kelly同女助手到九龍塘St. Catherine's接放學，由於啱啱落咗場大雨，Kelly攞住囝囝心愛嘅熊貓遮仔出現，佢話：「今年升K2，由紅磡轉咗嚟呢度返學，囝囝都要由頭適應。」
Kelly話噚日由工人帶返學，唔知囝囝有冇扭計，佢自爆：「我好緊張呀，我幫佢準備新書包、新書、新校服同新髮型，剪短咗啲，我唔敢操刀，𠵱家要見人，肉酸會俾人笑，囝囝今日緊張啲，乜都新，希望佢越嚟越愛校園生活。」
蝦餃仔放學出嚟，Kelly半跪同囝囝合照，不過蝦餃仔就顧住玩遮，Kelly話冇雨叫佢收遮，貪玩嘅蝦餃仔話：「有啲雨呀。」Kelly問囝囝喺學校有冇扭計？蝦餃仔話：「我冇喊，老師讚我乖同叻。」之後Kelly拖蝦餃仔上車，佢邊行邊咬書包帶又cool爆唔睬人，十分鬼馬。
呂麗君囝囝勁喊
【北角】另外，劉鑾雄同女友呂麗君嘅囝囝已經3歲，噚日呂麗君帶囝囝到北角維多利亞幼稚園返學，全程由四位保鑣護駕，囝囝由女傭緊緊抱住，呂麗君用手幫囝囝遮面，保鑣又出動遮陣擋鏡頭，好大陣仗，囝囝喊咁口入學校，呂麗君摸囝囝面呵番佢，終於成功送囝囝返學。
採訪、攝影：溫敏芝、葉君海、吳耀輝
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24