一年一度嘅公益金便服日會喺本月27日舉行，恒生銀行（011）副董事長兼行政總裁李慧敏（Rose）平時雖然都係着黑色、灰色套裝多，不過佢作為公益金籌募委員會聯席主席，到時當然亦會同員工打成一片，一齊着一日便服玩番日啦。至於到時打算着乜？佢話係秘密喎。
恒生執行董事兼財資業務及投資服務主管馮孝忠解畫，指便服日嘅dress code一向由大公關張樹槐話事，成間銀行嘅同事着同一個主題嘅便服，最重要係突顯公司有團隊精神，影大合照出嚟嘅效果先至好睇。舊年佢哋全體上下員工就以奧運為主題，齊齊着運動衫返工。
政務司司長林鄭月娥噚日為呢個活動主持開幕儀式，林鄭仲好識做咁專登換上短袖T恤，襯番便服日個主題，如果Rose姐同馮孝忠都齊齊換埋便服，咁就仲夾。
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24