有說香港的九十後都是由外傭帶大的，可惜打開報紙，女傭虐少主、僱主虐女傭等案件屢見不鮮。上周印傭被僱主虐待的疑案，劇情更是峯迴路轉，彷彿僱傭關係注定對立，其實大家只要做多一點點，買菜也可以買出母女情。
記者：陳慧敏
攝影：黃子偉、楊錦文、陳慧敏
快樂源自Candy Crush
「你睇落最多得十四歲，真係夠秤？我唔想犯法喎。」「唔係呀太太，我十九歲讀完高中㗎啦。」這是陳太與印尼來的Yanti的首次對話，那時Yanti只會一點點廣東話與英文，受聘來照顧陳太只得十歲的兒子。兩個女人指天篤地，雞同鴨講，要等懂印尼語的丈夫回來繙譯，陳太：「好在我唔鍾意鬧人，畢竟大家文化唔同，有事慢慢講，雙方都一齊慢慢學喇。」
印尼是回教國家，Yanti不吃豬，很少跟陳太出外吃飯，卻能夠煮出一家人最愛吃的惹味排骨，由溝通不靈，到學懂流利廣東話，陳太竟有種怪怪的感覺──女兒長大了！她竟不知不覺間視Yanti為女兒！二人一逛街就挽着手，由街頭行到街尾雞啄唔斷，去到雜貨店，相熟老闆娘說：「啲細路硬係掛住食埋啲立雜嘢。」陳太：「係啦！我囝囝同佢都係呀，佢仲成日食公仔麵唔食飯，激死！」Yanti抱住陳太胳膊以笑遮醜：「咁我鍾意食印尼撈麵吖嘛。」閒時，二人會一齊玩Candy Crush，Yanti會讓陳太看她男友的靚仔相片，早陣子Yanti手機壞了急到喊，陳太即贊助她三千元買手機。陳太：「有次我好唔開心，佢一直陪住我安慰我，講到佢都抱住我喊埋一份，我覺得多咗個女。」說時二人對望笑彎了腰，但兩雙眼睛頃刻染紅，Yanti還跑到廚房抹眼淚。陳太：「四年前我退休，可以專心打理家務，Yanti其實可以返屋企，但我就係唔捨得，佢都未想返屋企住，就一直留喺度。」
八年來，Yanti只回鄉兩次，第一次待了一個月，第二次只待了兩星期，單靠吃印尼撈麵可以解鄉愁？Yanti：「我高中年代嘅朋友多數結咗婚，或者因為打工搬走晒，回鄉好悶，反而喺香港我有更多朋友，又掛住太太，所以就提早返香港。」但終於，Yanti敵不過爸爸與男友兩三年來的催逼，明年就得回鄉結婚去，陳太：「佢走咗我唔會再請工人，離別嗰刻好慘。」臨走前，我再問Yanti住在陳太家，真不想自己家？她有點害羞，細細聲答：「我鍾意佢催我：『食飯喇！』感覺好暖，好似媽媽。」
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange