皇馬中場奧斯爾，喺今個夏天轉會窗關閉前最後一刻，以天價4,250萬鎊（約5.1億港元）轉投阿仙奴，即時成為廠迷新寵兼熱爆twitter！成為英超標王嘅大眼仔，仲好識做咁喺facebook個人專頁，寫公開信感謝皇馬球迷。
奧斯爾過檔阿仙奴呢單料，雖然已經講咗幾日，但去到轉會窗關閉之前，都只聞樓梯響，又話佢喺德國做體測，又傳出佢會披上槍手11號波衫，仲有球迷搶先用印有「O2」贊助嘅舊波衫，自製大眼仔戰衣！喺最後一日轉會窗，奧斯爾（Mesut Ozil）嘅名，成為了twitter「用字之王」。據BBC報道，喺9月2號短短24個鐘內，全球twitter提過「Mesut Ozil」一字超過300萬次！加里夫巴利加盟皇馬又點？喺twitter提起「Gareth Bale」嘅次數，都只得80萬次，真係拍馬都追唔上。
好彩一切順利，大眼仔以破阿仙奴轉會費紀錄嘅4,250萬鎊加盟，仲做埋今夏英超標王；德國國家隊隊友普多斯基即時同新球會隊友合照，上載instagram。至於熱愛玩twitter嘅韋舒亞，都即時留言話：「（奧斯爾）一定係夏天最佳收購！一個踢法甚有阿仙奴味道嘅超卓球員，歡迎你加盟！」之後佢又同普多唱雙簧：「希望奧斯爾冇你咁黐線啦，兄弟！」
感人告別皇馬球迷
至於大眼仔本人，就喺fb專頁同皇馬球迷道別，態度好鬼真誠，睇到皇馬迷即時狂插球會賣走呢位德國中場。fb有成1,100萬個like嘅奧斯爾話：「多謝皇馬球迷呢3年嚟一直支持我，喺皇馬嘅日子對我嚟講係獨一無二嘅。不過，有時事情發展唔一定會跟我預期一樣。雖然我要離開皇馬，但係我希望球會同球迷都會前程似錦！而𠵱家，我好期待去新球會：槍手！」
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24