雖然阿爺想唐、梁營互修舊好，但唔妥就唔妥，香港營真係No way！好似噚日人稱炒何嘅何柱國開Party，慶祝佢星島集團旗下嘅《東周刊》十周年，但喺呢個大日子，星島請嘅主禮嘉賓竟然唔係特區No.1狼振英而係政務司司長林鄭月娥。炒何仲好決絕咁用一個「冇」字，回應佢冇邀請狼振英嚟happy囉。
「勤力未必考第一」
炒何呢場Party喺會展舉行，Plan B熱門人選曾鈺成同林鄭都係主家席座上客，其他都係唐營friend底，包括林健鋒、葉澍堃等，稍為沾得上邊嘅梁粉都只得李國章。第二圍主家席都係唐營為主，有田北俊、胡定旭同梁君彥。唐營愛將袁莎妮及同狼振英反目嘅尖啤亦有到。
八方噚日去問何柱國，點睇狼振英民望長期肥佬，向來寸嘴嘅炒何算畀面㗎嘞，猛話狼振英好勤力，「但勤力未必可以考到第一」，繼而話佢起碼都可以考到第二、第三嘅，努力啲就得㗎嘞。至於點睇政府管治？佢話交畀市民同傳媒評價，唔通佢自己冇眼睇？
《東周刊》社長黎廷瑤解釋，東周只係十歲生日，唔使請到特首咁隆重喎，仲話林鄭肯嚟主禮係最適合嘅人選，好似都唔想狼英同大老闆同場咁款噃！之不過咁，睇在阿爺份上，《東周刊》都好識做嘅，喺十周年特刊登咗狼振英專訪，題目叫做「打不死，迎難上」。由唐營嘅雜誌報道，係咪好有玩味空間呢？
mailto:[email protected]
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24