「星之子」陳易希17歲獲科技大學破格取錄，今年23歲已經係應用程式開發公司老闆，佢雄心萬丈，希望兩年內儲夠子彈買樓收租，即係要25歲做埋業主。之前有人話「生女要似趙海珠」，如果陳易希兩年後做得成業主，到時應該要改為「生仔要似陳易希」!
唔使家人出錢幫手
陳易希舊年創立應用程式開發公司，專做Apps，佢同大部份香港人一樣，一邊狂呻香港樓價高得唔理性，另一邊依然好想買樓，佢話，山頂樓梗係冇信心，但係升值潛力高嘅元朗、沙田樓就應該應付到。不過佢預計只係儲60萬元首期。
以正常三成樓按計算，呢個數做首期，喺𠵱家呢個市，只係買到200幾萬嘅單位。除非好似星級基金經理陸東所講，樓價未來兩年將從高位大跌50%，否則陳易希應該好難買到元朗、沙田樓，屯門、天水圍可能容易啲。佢仲話唔使家人出錢幫手㖭。
或者好似17歲嘅達洛伊西奧（Nick D'Aloisio）咁，佢早年整咗個新聞摘要應用程式Summly，除咗獲李超人旗下創投基金科水投資之外，今年初更被雅虎以超過兩億元高價收購，一夜致富。陳易希畀心機整個會生金蛋嘅App，咁就好快願望成真了。
洋名Stark嘅陳易希，亦希望可以成為港版Tony Stark（Iron Man主角），擁有自己嘅實驗室，名成利就。佢噚日着住黑色西裝，出席由恒生管理學院舉辦嘅德意志ETF投資比賽，擔任其中一隊參賽者的模擬投資客戶。佢會將一個50萬元嘅模擬現金組合，交畀五名學生打理，希望佢哋幫手搵到錢。
現實生活中，陳易希嘅投資往績麻麻，只係炒iPhone賺過錢，投資股票、外匯都蝕錢收場。可能佢真係啱買磚頭。
李華華
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange