電影《激戰》帶畀大家嘅回響，勁抽到不得了！金句精警，演員出色，都咪話唔利害，見到張家輝可以操得咁fit，搞到keep fit中嘅Pro J亦不敢偷懶，加緊努力，務求臨熄燈前整排「朱古力」畀自己睇下。
商業社會嘅激戰，就更加多。近期有一單deal，一開始就吹得好勁，點知埋身肉搏，豪無激戰可言。講緊嘅咪係和黃（013）賣百佳呢單deal，仲記得嗰時，和黃當百佳係皇帝女，覺得唔憂嫁；一叫叫到40億美元（約312億港元），點知頭一輪競投無人跑出。𠵱家得番華潤創業（291）係最似樣，不過市場話同和黃叫價仲有一段距離；轉個彎睇，無一樣叫做志在必得嘅。大家都知，李生賣嘢，時間同價格可其準繩！但係𠵱家又唔好忘記，好多嘢係相對嘅，係唔係！
買賣家各出奇謀在商場激戰，有排玩。有一樣嘢，係你同我都無嘅，就係和黃作為一個綜合型企業，加埋長實（001），之唔係家底夠厚囉。百佳即使賣唔成，仲有大把資產可出售套現。近排和黃同長實就宣佈，一齊出售廣州西城都薈廣場100%連負債，各佔一半，有差唔多5億元落袋。確實係搵個「靚茶餐」食住先，頂頂肚；唔知係咪食開有條路，長和系又將上海百個物業放售，以60億人仔「等着你來買」。
李生玩長短倉策略
以財技嚟講，李生不斷沽中港市場資產，同時又反手喺歐洲、澳洲買資產，正是對沖基金嘅長短倉（Long short strategy）。
作為一個頂級（加多個超班）投資者，長短倉組合重置當然係毋庸置疑，但係作為香港人嘅figure head，李生又會令到好多粉絲好迷失！你係我哋嘅精神領袖，香港冇咗你，點會仲有獅子山下有香港精神啊！
徐燦傑
中國銀河國際財富管理主管
本欄逢周三刊出
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24