雖然奧斯爾喺twitter威到盡，但係返到facebook，人氣王始終都係以宇宙價8,530萬鎊（約10.3億港元）由熱刺轉投皇家馬德里嘅加里夫巴利。呢兩個星期喺fb，like呢位威爾斯國腳嘅人數暴增！
玩埋instagram吸球迷
巴利上馬吸引咗20,000名球迷，入巴拿比奴睇佢加盟。成為全球最貴身價球員嘅巴利，即時開instagram account，上載換緊銀河艦隊波衫見球迷嘅相，仲話：「今日真係好正！好自豪可以加盟皇家馬德里，多謝所有球迷嘅支持！」帶埋一家大細去歡迎會嘅巴利，仲好識做咁喺twitter多謝熱刺球迷，過去6年嘅支持，仲話唔會忘記呢段日子。雖然巴利咁講有啲做作，但係總比「𡁻完鬆」好吖。
唔單止咁，巴利仲好快手咁將fb同twitter嘅封面相，改做喺歡迎會嘅相。fb嗰張係佢攞意頭，對住個空龍怒射，twitter就係佢踢波上看台畀球迷睇。咁鬼識做，唔怪得呢兩個星期佢個fb，突然多咗287萬人，總共有超過440萬人like佢啦（左圖）！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange