處境劇提到「女人最大情敵是遊戲機」，打機困身是常識吧？要女人唔拎閣下打機時數和陪佢的時數作比較實屬妄想，女人覺得為部遊戲機扯火更戇居，最理想就係一開始搵個唔打機的男友。
打機友解釋，「PSP等下載遊戲純屬消遣，但網遊同人太多互動先係負擔。」咁強國負擔一定好重了！文化部早預期2015年尾大陸網絡遊戲市場規模逾千億元（人民幣．下同），年複合增長逾20%，近期科網概念連環破頂，但算漏一隻光宇國際（1043）。
光宇早年開發的王牌遊戲《問道》同時在線人數曾達100萬人，股價曾炒上17港元，近年寂寂無聞，不過近日終於見起色，網遊盈利貢獻6,381萬元，按年升26%，加埋佢哋取得人氣網遊《勁舞團》韓國開發商YD Online，最新研發的《靈魂戰神》獨家代理權，為大陸首款「集戰略動作和角色扮演」的3D網遊，近日開始測試。
另外，佢哋亦具手機概念，手機鋰離子電池成為主要盈利來源，該項純利大升115%至5,199萬元，大客有聯想（992）、酷派、華為等，珠海廠房擴大鋰聚合物電池的生產設施，產能有助提升，相信升浪才剛開始。
Samantha
本欄逢周一、三、五刊出
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24