王維基嘅香港電視前排裁員，俾人感覺好似捱唔住，某啲劇集開拍一集試吓觀眾反應至決定拍唔拍，講到危危乎咁。其實香港電視啲劇集陸續開拍，蒙嘉慧加盟同林文龍合作嘅《天網》，下個月就開工，而林文龍另一套新劇《Night Shift》都開緊工，套劇專講做夜更工作嘅人嘅故事，林文龍飾演警察，其他演員仲有林嘉華、郭峰等。另外，噚日又啱啱為即將開拍嘅新劇《大眾情性》舉行記者會，王維基都有出席，成班藝員仲好有士氣㖭。
王維基噚日為裁員親自解畫：「每年公司會請表現較差嘅同事離開，再請番人，係換血，喺競爭之下汰弱留強，同財政冇關，我哋每月支出兩、三千萬，一年都係三億六啫，有足夠彈藥。」對於亞視嘅騎呢路向，王維基唔想多講，只望政府聽到民意。
美棋BB處女失身
至於套新劇，係圍繞性做話題，黃美棋就飾演一個18歲女仔，講第一次失身過程，現實中美棋BB就守身如玉，佢話：「我冇呢個經驗，要向人請教。」即係仲係處女？佢好尷尬話：「唔……唔好講呢啲，怕醜。」而N年前曾發生動L事件嘅陳栢宇都有份拍，佢話動L都係正常反應，但就叫女友千祈唔好嚟探班，免得尷尬。
版主：陳基征
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24