台灣老友教曉我一句閩南語「規卵芭火」，即係極憤怒，火大到連「卵芭」都有火，廣東話「好X㷫」意思。老友睇到香港人抗赤化廣告登到去台灣自由時報，立即詢問香港人係咪已經㷫到爆炸，我話真係好X㷫。
近月老友碰面都在罵，香港搞到群魔亂舞，政府仍不知羞恥，就如林行止慨嘆今日香港已不再係我哋熟悉嘅地方。陳淨心、高達斌、陳廣文、劉達強，究竟乜嘢人嚟？一班古靈精怪人物充斥政壇、傳媒。群眾有群眾鬥，老廉有老廉鬥，比十年前老董下台前更癲更喪。
一切同梁振英上台後開始，弱勢政府採取政治手段，政策讓路予政治，整個政府除了盲搶地外，施政方向欠奉，政策已到了亂晒龍地步。最新例子係工廈劏房補助，由林鄭領導，羅致光掌舵之關愛基金，竟然可以派錢比工廈劏房戶，民粹到了如此地步，不如索性在政策上將工廈劏房合法化。林鄭自土瓜灣冧樓事件後，多次表示自己幾傷痛，要解決劏房問題。係人都知劏房戶涉及政府恩恤及安置政策，唔搞好政策，所謂傷感不過係政客廉價眼淚。幾年下來乜都冇變冇做，惟有貼塊膠布止止血，派些少錢頂住檔。
香港政務官良好管治，講求政策理性，延續性等核心價值，逐步淪亡。以後政策討論根本唔再需要論證過程，冇需要說服財務科、民意代表，上財委會申請。
而政務官訓練根本嘥氣，一切長官意志，政治掛帥。當關愛基金派完，便要由政府福利開支吸納，政府福利政策原則將全面崩潰。
業餘政客沉迷政治最弊
一班業餘政客沉迷政治，先至係今日最大鑊所在。為了主動出擊反攻，搞出一大棚不知背景團體，用低劣粗暴手法挺政府，令中產心寒。為了反擊泛民，梁振英不理特首身份，攻擊廉政制度，甚至出現警察政治化，黑人物為特首落區護航場面。
香港過去民主欠奉，但至少仍有善治，政務官保守，但有規有矩，尊重內部規範，視政策理性為最高原則，重視社會主流價值，以文明方式處理政治角力。自「91直選」，20多年來已形成一套本土政治文化，一套相對內地文明得多的行為規範。今日睇住一步一步後退，香港已非自己熟悉地方，又豈止是林行止一人感受，香港土生土長，邊個唔係「規卵芭火」。
添馬男
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24