前幾日講新一代夫婦覺得香港教育幾複雜，要求在校友會午餐會搵人演講學校問題。呢日在朗廷酒店午飯，又碰到一位年青媽咪話為個五歲兒子之升學問題擔心，唔知好唔好去搵直資學校。左丁山問佢住在那裏，佢話住在沙田，咁就比較容易啦，沙田區在比例上最多EMI（英文中學），而且多數係Band 1學校，考入中大嘅學生數不勝數，校區真係好好咯，仲有乜好擔心？講到尾，又係驚怕輸在起跑線上，其實以左丁山之見，有時輸在父母身上就真，父母在家若不以身作則，培養家庭讀書氣氛，送子女入直資或英基或國際學校都未必一定掂。香港有不少屈穎妍筆下嘅怪獸家長，一定要送子女入直資名校，入到啦，又處處維護子女「人權」，與學校訓導或輔導主任爭論，子女點會下定決心讀書求進步吖。
香港家長成日話香港教育唔好，要送仔女去英國，點知英國人擁有嘅「經濟學人」之旗下智庫，在八月二十九日發佈「全球最宜居城市排名表」，以教育，社會穩定，醫療基建，文化及環境五大項目評分為準，香港居然得到平均分92（滿分100），其中教育一項，仲得到100分㖭！嗱，英國雜誌話香港教育值100分，陶傑唔會彈嘞啩。全球最宜居城市前十名係墨爾本、維也納、溫哥華、多倫多、卡加利、阿德雷德、雪梨、赫爾辛基、柏斯、奧克蘭。澳洲佔了4個，加拿大佔3個，可見得如要移民，澳加係香港人最鍾意嘅地區。
有人話隔籬飯香嘅新加坡排第54位，台北排61位，中國大陸城市以蘇州最好，排73，北京第74。
將香港與新加坡比較，新加坡只有在基建方面贏香港（大家都知新加坡填海、建屋、起機場跑道都快過香港好多），但新加坡只得平均分88.7分，教育更只得80分，你話香港教育差得去邊吖，其實在全世界享有盛名，只有香港人痛駡而已。左丁山一貫主張讓子女享受12年免費教育，每年儲蓄52000元（聖保羅男女一年學費），12年就儲夠624,000元，到子女中學畢業之時，起碼有一筆種子基金俾佢地去英美讀大學先，如果考唔到本港心儀大學嘅話！