80年代已經加入香港興業（480），現為香港業務部總監、發展及市場部總監嘅陳子明，噚日突然宣佈10月1日提前退休，呢位賣樓話事人只係56歲，以𠵱家標準，點都未算老，退休真係言之尚早。
陳子明喺物業發展同賣樓有超過30年經驗，經驗豐富，香港興業在港嘅著名樓盤大嶼山愉景灣，從大幅平地，到開山劈石發展多期低密度住宅，開通隧道連接二白灣，以至新近落成嘅島上酒店等，經過多年打造成環保小島，吸引唔少嚮往悠閒生活人士入去居住，陳子明肯定為呢個項目出過唔少汗水。
「地產界關之琳」上位
聽聞，公司內部唔少人都係噚日公司出通知先知道陳子明提早退休。佢嘅職務將會交畀執董鍾心田同助理總經理史慕蘭（Vivian）兩人分擔。Vivian早年被冠上「地產界關之琳」稱號，喺香港興業任職多年，曾短暫離開過檔盈大地產（432），但係好快回巢，似乎都係鍾意查氏家族做佢老闆。
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24