《信報》早前刊登一名署名「一寶」致林行止廣告。「一寶」批評林行止，認為「負責任之論政者應提出香港在中國發展中尋求共生共存之路，將中華民族帶向穩定光榮之大道」，林行止撰文回應萌生擱筆之念。
冇精神領袖 點會值錢
林行止上月底在《信報》撰文回應「一寶」，他說從反駁者的行文中察覺到一種訊號，指香港「已與過去漸行漸遠」，表明若被迫轉軚「忠於國家而非自己的識見」，自己寧「擱筆不寫」。練乙錚之後撰文表明，若《信報》沒了林行止，到了此田地，他也不能久留。《信報》自羅燦請辭，郭艷明上任總編後，已傳出會有「和諧淨身」計劃，老細打算將《信報》去政治化，變成純財經報云云。此傳言大家都不以為然，直到林行止回應神秘人「一寶」廣告，表示打算封筆，大家先驚覺可能已殺到埋身。
一寶係乜水，令林行止都驚？政壇八卦人士認為按筆名推敲，應是「二寶」哥哥。二寶又係乜水，大家自然想起在特首選舉其間勇武地斥責特首辦主任，梁振英當選翌日拜訪中聯辦，佢親自送梁出門口畀記者拍照的那位曹二寶。二寶個大佬，會唔會係阿爺呢？如果林氏夫婦因支持佔中已受空前壓力，林行止不如索性將餘下股份出售，退出《信報》，睇睇《信報》冇咗林行止、練乙錚，銷路與廣告會否急升？今時今日，傳統報紙市場不斷萎縮，美國老牌報紙《華盛頓郵報》賣畀Amazon老闆貝索斯都只不過係2.5億美元，香港傳統報紙同樣面臨讀者流失，影響力也下降。如果《信報》連精神領袖都冇埋，你話仲值唔值錢？
究竟反佔中係咪去到不惜代價玉石俱焚？可能有人真係想將香港推入文革鬥爭狀態，但時代已唔同，今日即使逼所有主筆、學者、專業人士、商界全部收聲，只准一種聲音，又如何？只要市民對普選訴求仍在，北京又攞唔出一個主流民意接受嘅普選方案，佔中就有其民意市場。道理根本好易明，巿民知道佔中係手段，毋須再花時間打口水戰，十年前推銷廿三條，已犯過同樣錯誤，當時連銀行界李國寶也頂唔住要公開反擊，十年後又再犯一次，今次打擊面可能更大，但反撲亦會更大。
內地寒風凜冽，會否吹到香港？快啦！
添馬男
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24