喺上個禮拜二嘅「金手指」，孫柏文話過會講兩個禮拜五前，我叫過一注獨贏嘅珠江鋼管（1938）的業績，所以今日同大家交代。
呢份早前佢發咗盈警嘅業績，比想像中好，盈利只跌58%。唔似股價之前price in咁，唔係悲觀式結果。佢哋亦將早前被注目、由工業變商業嘅地皮入賬，值20億元嘅地，扣除稅同補地價等，為公司資產值淨升值11億元，即珠管市值嘅四成半。
關於塊地，早前我同珠管最高領導層見面時，同佢話有一個指標，最能量度股民對公司信心，就係市盈率（PE）。如想股民接受更高市盈率，其中一項就係好似青姐胡孟青話齋要專注本業，所以同佢話珠管要將地賣出，跟住派息或減債。聽完佢哋都話，係其中一個辦法。
假設珠管用𠵱家佢哋入賬嘅價錢，賣到塊地，股價喺消息後，我估都唔會升，因為喺呢刻，股民唔覺得你賣地賺，佢哋有乜嘢得益。所以塊地一定要賣，最好係拍賣，因為你賣畀友好，就算高過市價，都會令股民覺得你造假，踩低你市盈率。
倘賣地後派息 添信心
如果將地賣後派息，股民就會覺得公司認真，會將本業以外嘅意外之財，當意外咁派，到時市盈率一定升，股價就會反映市場對你企管有信心嘅溢價。
唔知係啲軍師渣，定係啲上市公司話事人真係咁蠢，吓吓諗住搵自己控制嘅上市公司笨。其實，市盈率升，係手上股份價值上升嘅回報。你係上市公司主席，睇完我呢篇文唔信的話，你就去問吓你個軍師係定唔係，如果佢話唔係，咁你問吓佢：「思捷（330）嗰個邢李㷧呢？」
哎，珠管好，其他上市公司都好，你揸正來做，我哋一定畀番個合理市盈率你！一定升。
孫柏文
獨立股評人
http://facebook.com/shuen
本欄逢周二刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange