城中兩大孖沙：彤叔（鄭裕彤）同大劉（劉鑾雄）一齊揸住嘅利福（1212），近排搞緊分拆上市，身為公司董事兼主要股東嘅純官原來唔只缺席傾分拆個董事會會議，舊年五個會議全部No Show。純官噚日就現身周大福（1929）股東會，不過卻全程齋講「金」，唔關周大福事嘅問題一律唔答。
利福董事會全No Show
純官噚日其實都算有問必答，不過就只限同周大福有關嘅問題，好似金價同租金咁，笑住話加租都冇有怕。至於問到新世界（017）樓盤溱柏同分拆酒店上市，佢就全部唔答。
至於佢大仔Adrian，更加趁老竇俾記者包圍乘機走咗，認真鬼馬。最後華華想問彤叔身體如何，純官已經閃埋。
利福地產（2183）噚日開始招股，收咗100萬孖展反應都算OK。利福10名董事入面，有5個因為係分拆屬關連交易喺董事會投棄權票，純官就同𠵱家仲養緊病嘅主席彤叔齊齊缺席，即係最後得返3個獨董投票。
其實純官過往喺利福董事會出席率一向唔高，但09至11呢三年都仲有出席一至兩次，但到上年年初接棒周大福王國，唔知係咪貴人事忙，竟然繼08年後，再一次全年五次董事會全部No Show。
市傳純官同大劉兄弟關係好普通，但佢另一個乖仔Brian舊年娶老婆時，雖然彤叔入咗院嚟唔到，細劉都一樣畀面去飲，雙方關係似乎唔算太差，至於大劉？華華又見唔到佢喎……
李華華
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange