【本報訊】剛過去的暑假，大寶擔張摺凳在上環文武廟擺檔，拍了近百張即影即有照片，聽了無數陌生人的故事，「我以前讀呢間小學」、「把照片寄給英國的老媽」。自幼在荷李活道長大，眼見香港開埠後首條街道近年變遷不斷，老舖變蘇豪。過去兩個月，他透過一幀幀黑白照，記錄消逝中的社區，留住昔日的街坊情。
記者：王家文
坐在摺凳上的大寶看着《北漂十記》，身旁放了一部40年歷史的寶麗來相機，腳架則用來掛起照片冊當招牌。一對情侶剛巧經過想拍照留念，在文武廟旁的樓梯街取景，他按下快門後就自我介紹，「我喺呢度住咗25年，呢區變咗好多」，「四方街以前有好多長生店……」話題總是這樣打開。
燒味舖變酒店一角
大寶原名謝宋洭，是城市大學念創意媒體碩士生，在荷李活道住了25年，苦笑自己在不斷拆卸和鑽地的環境下長大。他記得小時候有個燒味阿叔，總會斬件免費靚叉燒給他，但燒味店現已變成精品酒店的一角；還有那間迷你超市，三次被迫遷，「第一個地方我成日去買魚蛋，轉去第二個地方我就買媽咪麵，搬去第三個地方時我已經大個」。
當老舖變成酒吧、咖啡店，這個蘇絲黃世界下的荷李活道，變得越來越陌生，「佢哋係消費緊呢度好舊嘅感覺，但唔會知道間酒吧拆咗之前嘅士多、報攤或香燭舖」。有逾百年的磅巷也要變身扶手電梯，「連少少歷史都冇埋，咁鄰里關係仲剩番乜？」既然捍衞不了發展這硬道理，倒不如拿起相機留住一些人和事。
擺檔兩個月，原是陌路人也被大寶拉近成熟識的街坊。他最記得有個婆婆每日下午3、4時都會帶隻6歲松鼠狗散步，「不過最近冇見佢」；有次遇上一名年過半百婦女，說起以前在文武廟旁的小學念書，「我先知間學校原來有超過50年歷史」；也有一對外籍情侶住在四方街，男方要求拍下他們從樓梯街走下來的浪漫一刻，寄給英國的老媽看。還有芬蘭小男孩、人力資源公司CEO……。
擺檔兩月常食白果
每張照片20元，擺檔兩個月很多時也食白果，但對大寶來說，賺錢其次，建立鄰里關係才最重要。跟他訪問時遇上一名外籍婦人，好奇大寶拍下的鄰里照。她說在荷李活道已經住了30年，「這裏變了很多」，指着樓梯街的扶手說：「這個也是新的。」還記得大寶所用的古董相機，「我父親也有一部」，細說當年拍下的照片，至今仍歷久不衰。「其實每一次影即影即有都係一種緣份」，每張黑白照的底片，大寶都會好好的保存起來，「所以每一張我都好記得佢哋嘅故事」。他說攝影只是一個中間點，用來拉近鄰里情，「如果有一日，芬蘭小朋友行過，CEO又行過，然後佢哋兩個傾偈，呢個就係我最想達到」。
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24