【蘋果基金撥款】
家有一老，如有一寶！保良局周鴻標老人日間護理中心舉辦「長青齊畫豐盛人生」計劃，獲蘋果日報慈善基金撥款近9,000元推行，以「昔日的衣、食、住、行」為題，由身體屬中度至嚴重缺損的老友記帶領青少年義工，齊齊構思及「落手落腳」製作藝術品，盡顯長青共融一面。
記者：李錦欣
老友記及來自專上學院的義工共40名，以一對一的方式分成四小組，每組負責「衣、食、住、行」其中一個範疇。該中心主任馮嘉雯表示：「平時活動多數係青年教長者用電腦，但今次呢個計劃希望以老友記做主導，由長者教青年，例如教後生仔畫公雞碗同寫毛筆字。」
透過合作交流經歷
負責「食」的Tony（78歲）和Spring（27歲）選擇以「公雞碗」作主角，「因為公雞碗生活化又有代表性」。他們更以各種豆類作材料，逐粒貼到畫紙上，心思滿分。
謙稱自己「一世牛命」的Tony，曾在不同國家的出入口貿易行工作多年，常到外國公幹，「以前淨係識得搏命做」。在旁的Spring立即踢爆Tony原來精通英文、德文及法文，真是深藏不露！Spring稱讚道：「想當年佢（Tony）由內地嚟香港，之後不斷進修學外語，好上進。」
Spring續指，社會上老友記的形象較刻板或教育程度低，「係班老人家奠定香港今日嘅地位，每個人都會有值得分享嘅故事，今次活動可以同長者傾偈、合作，透過佢哋嘅回憶，當中聽到好多人生經歷」。Tony也感謝眾多義工願意一同玩樂，「佢哋整作品時幫咗好多」。
性格內向的八旬洪姐和阿貞（24歲）則負責「衣」的部份，她們選擇以布碎拼貼成舊衣，懷舊味濃。寡言的洪姐也難得「大開金口」說：「好少見後生仔，一班人一齊整嘢好開心！」正在大專院校修讀長者服務的阿貞表示活動獲益良多：「自己同老人家親身接觸之後，當中了解佢哋嘅能力，例如節奏會慢少少，設計比較啱佢哋嘅活動。」
「衣、食、住、行」四幅作品現已拼湊成一間屋，並展示在該中心門外，中心將印發500份特刊派發予區內長者，讓社會人士感受兩代互融及文化傳承！
「社福機構專戶」捐款編號：S0006
網上捐款： http://charity.appledaily.com.hk/donate
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24