利物浦終於可以抬起頭！紅軍藉壽星仔史杜列治連續第3場聯賽建功，在周日英超大戰主場1:0擊敗曼聯，成為唯一一支開季3戰全勝球隊，沉寂逾4年半後終再上榜首。以爭前4為目標？利物浦甚至已被看好有力染指失落了23年的頂級聯賽錦標。
1年前，紅軍正陷入前所未有的困境，首5輪聯賽皆未能取勝，平了球會百年來的不勝紀錄。事隔一年，仍是由領隊羅渣士帶領的利物浦，表現卻已截然不同，連續3場聯賽以1:0取勝，自09年1月之後，事隔近1,700天再次在英超登上榜首。紅軍上一次在聯賽開季3連勝，已經是1994/95球季的事情；若要數最近一次在英格蘭頂級聯賽，有球隊能在首3戰不失球下贏波，便已是1920/21球季的哈德斯菲爾德。
羅帥：前4為大前提
紅軍強勢，不過領隊羅渣士在賽後仍不敢過於高姿態：「前面尚有35場聯賽，現階段的成績，並不代表甚麼。己隊仍有不少地方需要去改善，要做的工作還有很多，不變的是我們最基本目標，仍是以爭逐前4位置為大前提。」談及連續3場聯賽的入球功臣史杜列治，羅渣士說：「我對於他為球隊的貢獻感到十分欣慰，他並非處於十足狀態，不過即使只得7成狀態，他仍比很多英超前鋒還要優秀，不斷威脅對手後防線。」
足智彩將利物浦的英超奪標賠率，由開季前的18倍到目前升溫至9倍，反映紅軍爭逐頂級聯賽錦標，受到更大程度的看好。事實上，曼聯與曼城在今季的表現不如上季般強勢，而利物浦亦毋須應付歐聯或歐霸盃賽事，更能集中火力，一心爭逐英超。
再簽3新兵增兵力
另一邊廂，利物浦亦趁周一轉會市場關閉前，作增強實力的最後衝刺。紅軍在周一先後簽下巴黎聖日耳門守將馬馬度沙高、士砵亭的中堅泰亞高艾羅尼以及借用車路士翼鋒域陀摩西斯，3人皆有在擊敗曼聯的比賽中成為座上客。
文：何西
網友反應：利物浦今季有機奪冠？
Lingbb_yam：
好感動呀！利記榜首！3連勝啦！太激動！唔知今年有冇機呢？前4都好呀！
Adodo：
睇好利記，始終冇其他球隊咁多賽事打，主力聯賽有着數，但謝老四仲係好重要。
Trulli：
利物浦嘅進步的確好大，尤其防守逼搶做得唔錯，控球亦進步好大。
kalil219：
利記暫時上咗榜首，當然值得高興，但無形中為球隊帶來壓力，呢個時候更加考驗領隊功力。
曼聯好多球員唔夠班！
虎皇：
楊格同韋碧克真係好廢，英人身份先有咁嘅身價同人工，但放眼歐洲佢哋真係冇乜資格喺大會踢波。
~零~：
拿尼衰極都好過華倫西亞同楊格啩！香川又係唔知點解唔出！
高文：
聰明仔完全冇料到！都唔知佢究竟打緊咩位？
資料來源：香港討論區
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange