【綜合英格蘭外電】英格蘭領隊鶴臣周日入場睇雙紅會，觀察利曼球員狀態；可惜只怕越睇越頭痕，因兩軍兩名後防球員格連莊臣及菲爾鍾斯齊齊傷出，可用於征戰未來兩場世盃外的人選所餘無幾。
其實鶴臣入場就已經頭頭碰着黑，因安排失誤而未能於主席包廂睇波，要與其他球探一齊逼。雖然事後利記向鶴臣致歉，但後者看到格連莊臣及菲爾鍾斯齊因足踝有傷而離場，相信已沒心情為被拒諸於包廂門外一事發脾氣。
格連莊臣及菲爾鍾斯，已成為繼朗尼後另外兩名因傷退隊的國腳；後防空虛，鶴臣已即時召入卡迪夫城中堅哥爾卡，於周五對摩爾多瓦，以及下周二對烏克蘭的外圍賽中候命。而最近聯賽3戰入3球的利記前鋒史杜列治，賽後亦稱大腿有輕傷，英軍可用之人買少見少；鶴臣唯一的安慰，就是主場對熱刺要提早離場的阿仙奴中場韋舒亞，只是因胃病退下火線，可在國際賽為三獅上陣。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange