澳門除咗賭業出名外，豬扒包店大利來記亦係每次過大海必到之處。早大半年先見呢間小店喺油麻地開分店，點知最近因頂唔住貴租焗執笠。
油麻地舖位先得350呎，但月租就要成14萬元，以一個包29蚊計，每日要賣最少161個包，先夠交租，頂唔順亦係意料中事。
喺大學時代，菲菲偶爾都會同班同學仔，一齊去旺角掃街hea時間，貪小店多花款又多特色嘢。
曾幾何時，單係家樂坊對開以至西洋菜南街一帶，就孕育咗唔少香港小食潮流，好似珍珠奶茶、燒墨魚丸、乳酪雪糕、日式班戟等，更有唔少人，食住當時潮流，喺呢一帶極速開小食店而賺第一桶金。
不過今時今日，旺角舖租癲價。𠵱家去由家樂坊一直行到銀行中心，九成八地舖，都係電器、化妝品、藥房等為人民幣服務嘅舖頭。連喺西洋菜南街屹立20年嘅銀龍茶餐廳都被逼走，許留山亦無得留低，兩舖位已分店租予六福（590）及韓國化妝品店。不過，𠵱家想靠喺旺角開小店創業起家，可以講係難過登天；就算想借地利谷人氣，都要有預咗微利甚至蝕錢嘅心理準備。
Fifi
本欄逢周二、四刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange