由無綫過檔去nowTV嘅金牌監製劉家豪同梅小青，首部開拍嘅劇集《大漢賢后衛子夫》啱啱喺橫店煞科，呢部幫now進軍電視市場嘅開山之作，耗資過億元，劉家豪、梅小青仲出盡法寶，搵咗林峯做男主角，配內地花旦王珞丹同周麗淇，因為呢部係內地嘅華策影視有份投資，所以無綫親生仔都可以拍，嗰陣仲話林峯唔理公司反對堅持接拍，而無綫出身嘅葉璇都畀面梅小青，特別客串一個角色。
雖然now嗰邊講明無綫係有《大》劇嘅優先播映權，不過無綫會唔會買都未知，但親生仔幫人哋拍劇就已經係事實，唔知係咪要攞番啲彩，無綫今晚深夜會播較早前林峯同葉璇合作嘅內地劇《紫釵奇緣》，緊接住鄭嘉穎套《步步驚心》推出，一於提早宣示擁有林峯嘅主權！
葉璇隨時拍無綫劇
打鐵趁熱，林峯噚日同葉璇、金燕玲喺將軍澳電視廣播城出席《紫》劇宣傳，林峯話佢喺橫店拍咗幾部劇，短期內都唔會返去再拍，係咪又同女友千語BB（吳千語）去旅行？佢笑笑口話私人事唔講。對於有讀者報料話佢做港姐評判時左手無名指戴住戒指，阿峯就話：「只係代言嘅飾物，多謝大家關心。」而葉璇就話下半年做舞台劇，如果有啱嘅劇本，唔介意再同無綫合作。
版主：陳基征
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24