過江龍鎩羽而歸，本地薑開分店望繼承傳統。以懷舊地道美食諸如沙翁、忌廉溝牛奶等馳名的筲箕灣老字號百利冰室，以每月16萬元租用上環文咸東街22至26號柏廷坊高層地下，作為首間分店。
華華問人稱波哥既老闆韓文波是否大展拳腳，波哥回應：「少少嘢箒，唔係乜大展拳腳。同另一位朋友，拍住喺上環搞番間分店，試下得唔得先啦……初初起步，未必（食物）保持得咁好㗎！」，分店面積4,180呎，呎租38蚊。
大利來記連摺兩舖
嗰邊有百利擴張營業，𠵱邊就有大利來記要黯然結業。舊年年中強勢攻港嘅澳門知名豬扒包大利來記，喺中環擺花街同油麻地兩間舖頭，上個月都已經摺埋咗。大利來記負責人陳嘉儀（Wendy）話生意係唔錯，但賣豬扒包嘅單價始終唔高得去邊，加上租金好高，埋單計數要蝕錢，惟有止蝕離場。不過Wendy話唔會全身而退，𠵱家佢就度緊計轉型，計劃由外賣變堂食，希望可以吸多啲食客幫襯。以每個豬扒包零售價29元計算，中環店租金11萬元要最少每日賣127個，目前沙田同尖東仲有兩間特許加盟店繼續每日賣包。
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24