唱衰中金再生（773）、一戰成名的沽空機構勞克斯研究（Glaucus），上得山多終遇虎。上星期Glaucus唱衰新加坡上市的閩中食品，將其列為強烈沽售評級，目標價係零蚊！閩中股價倒水咁倒，跌咗48%去到0.53坡紙。噚日閩中阿媽Indofood出手，令到閩中股價升咗一倍，去到1.125坡紙，仲高過畀人唱淡之前個價，如果勞克斯未走貨，分分鐘畀人挾爆淡倉。
母企增持 股價倍升
究竟Indofood出乜招挾爆空軍？原來Indofood喺閩中上周一停牌後，噚日一復牌就以每股1.12坡紙增持，令到持股量去到33.49%，據新加坡上市條例，單一股東持股高過30%就要以相同價格提出全購協議，所以閩中股價企硬喺1.12坡紙樓上。
今次Indofood出手，令勞克斯幾頭痕之餘，自己都出晒血㗎，皆因佢股價噚日勁跌9%，反映投資者唔多睇好佢嘅收購計劃。呢單嘢同香港人有乜關係？原來香港上市嘅第一太平（142）間接持有Indofood 50.1%股權，如果Indofood出血，一太都唔使旨意冇事。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange