要數今年最強板塊，濠賭股繼續贏到你唔信。不過，有賭牌的六隻濠賭股，表現卻差天共地，強弱懸殊。美高梅（2282）、新濠博亞（6883）及銀娛（027）爆升六成以上，金沙（1928）不過不失，進賬37%，買中永利（1128）及澳博（880） 算你唔好彩，只有一成多回報。
買賭股勿拗頸追落後
上周曾赴濠江進行賭股實地視察，即使喺平日，由於暑假因素，感覺都仿如周末日般擠擁。雖然未能夠實際計算各賭場人數及投注額，但由細微細眼已經可以窺視到各賭股情況。
賭錢向來跟紅頂白，明明兩張枱最低投注額都係500蚊，一張圍晒人，一張拍蒼蠅，原因只是直覺上荷官弱勢，賭徒易贏錢。因此，買濠賭股，一定要買大唔買細，千萬不要拗頸追落後。
澳門去年11月開始禁門令，未滿21歲者禁止進入賭場。賭場為免被罰，但凡有懷疑就會查。
除了澳博新葡京外，筆者的同伴進入其他五間賭場，皆有「被抄牌」檢查身份證，同行的其他女性朋友，雖則已臨中女之齡，但亦一視同仁被抄牌，只有在新葡京可免直行直過。
原以為新葡京直入，只是職員走漏眼，但觀察咗五分鐘，有多名妙齡女子入場，亦沒有被查，是否隻眼開隻眼閉，抑或保安人士對自己嘅「眼光」充滿信心，筆者則無法判斷。
賭業重心轉移 地盤被侵
唔抄牌事少，但地盤俾同行不斷侵佔卻係事大。自威尼斯人、新濠天地以至澳門銀河進駐氹仔之後，濠賭的重心已經轉移至路氹。三間公司股價齊齊跑贏，金沙及銀娛染藍，新濠國際（200）今年飆升一倍更加係有目共睹。買濠賭股睇市盈率不切實際，澳博今年預測PE 15倍最平，但新賭場要等到2017年先落成。反之，新濠、銀娛及金沙明年有新賭場落成，永利及美高梅則於2016年有新賭場。
風水輪流轉，何鴻燊縱橫濠江半世紀，按目前形勢，極可能成為包艇大熱。濠賭股邊隻會贏，我唔識揀，但要揀最樣衰，我買澳博。
王昇
本欄逢周二刊登
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24