內地官方製造業PMI創16個月高位，港股噚日一度好似火箭咁爆升約500點，重上22000關，話咁易又殺咗一批「熊仔」。老實講，業績期啱啱say goodbye，績佳股都炒晒，難得有個好消息，好友餓咗咁耐，仲唔伺機突襲？
不過，今個月仲有大把炸彈等住拆，好似美國打唔打敍利亞、聯儲局議息結果，睇住美國幾項經濟數據又隨時炒退市，求其爆個壞消息，港股又要表演插水。
瑞信睇再跌逾四成
上星期金礦股發戰爭財，趁住黃金成為避險工具，金價升番上1,400美元。招金（1818）、紫金（2899）蠢蠢欲動，不過噚日就無力跟市升。
細細隻嘅靈寶黃金（3330）散水散得仲快，升唔上2元就碌番落嚟。
瑞信發表報告指，靈寶上半年盈轉虧，激蝕3.75億人仔，唔計一次性存貨撥備及商譽減值，都喪蝕1.89億人仔，遠差過市場及該行預期。
除此之外，瑞信又指該公司負債情況亦相當嚴重，絕對唔可以忽略，淨負債率已升至近200%！對其盈利及估值的壓力越來越大，故繼續給予跑輸大市評級，目標價仲要由1.1元降至1元，距離現價約1.78元仲有逾四成跌幅。
睇番走勢圖，10日線跌向20日線，走勢已轉弱，初步支持位在1.5元，若失守料將下試1.3元，有貨宜速逃！
瑪姬兒
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24