「中學畢業，我同啲同學都唔知有乜出路。有諗過做護士，不過後來我決定入港鐵做學徒。」此為女主角施巧輝在電視廣告中的對白。是真情剖白還是虛構故事假賣溫情？她說：「當初公司話搵學徒拍廣告，面試嗰陣叫我哋分享自己成長故事同工作態度等等，然後公司就按我嘅經歷寫對白囉。」幸好，無論港鐵是否無良企業、廣告是否假賣溫情，至少真有一個學徒叫施巧輝，十八歲中五畢業的她成績不出色，前路茫茫：「當時我好疑惑，唔知讀邊科好。本身半工讀緊護士課程，朋友去港鐵考學徒，咪一齊考吓囉。」廣告說做維修工作跟當護士一樣，同樣是照料他人的工種，言詞華麗，實情是風馬牛不相及。「當時唯一掙扎嘅係邊個請我先，淨係想把握住每個機會，當時根本唔知學徒其實要做乜。咁人哋請我，我就相信自己能力。」
「嘩！同想像真係好大出入，朝早返工夜晚返學，開初好唔適應。仲有，原來得我一個女學徒，身邊男同學一點就明，我好似望住人哋背影追。我雖然讀理科，但對車基本認識都無，頭兩個學期經常諗放棄。」施巧輝回想當初艱辛，兩眉緊鎖：「不過之後慢慢適應，唔識咪問囉。」憑甚麼堅持了四年？「原則囉！」三隻字吐得響亮：「簽咗約，答應咗，就要堅持，要畀自己一個交代。未努力過點可以放棄？」
坐在身旁的男同學麥添生是應屆技工學徒畢業生，比施巧輝的技術員學徒職銜還要低一級，他說：「又唔係做特技，大家一齊讀書箒。」跟不同師傅學習，施巧輝自言賺了幾百年人生。「每個師傅都有自己經歷，我哋邊有咁多個四十年去經歷唔同人生？同佢哋傾偈就好似濃縮地經歷佢哋嘅生命。」別以為書讀不好，就一定是顧着玩樂的壞孩子，正因為她自小已經知道自己不是出眾的一群，所以比大學生更早明白社會的遊戲規則，更努力去當好學徒這份工。
電視廣告裏施巧輝大聲說：「將來梗係想做工程師啦！」網民留言說此為港鐵騙局，一個中五畢業生的學徒可當工程師？根據港鐵公司提供的資料，進升之路是這樣的──技工、技術員、高級技術員、技術主任/督導、工程師、經理。「工程師係其中一個目標，當係有一個Checkpoint畀我望住嚟努力，考到工程師牌當然好。」麥添生呢？「督導！目標定得太高，失望只會更大。」他倆認清自己能力，不好高騖遠，會跟大學生比較嗎？兩人異口同聲：「無必要。」麥添生說：「以前有分數有得比，𠵱家工作無分數，只要努力，人哋會睇到。」施巧輝說：「趁後生要努力跑，唔跑老咗跑唔到。」年輕人，你們看到嗎？當你們不斷抱怨社會的不公義，空談紙上知識，他們已經腳踏實地跑了，如果當初施巧輝選擇當護士，人生會如何？她答得很妙：「無如果。未到死嗰日，都未知今日我做學徒呢個決定係啱定錯！既然未知，就要好好做好呢份工。」
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24