【人物專訪】
電影《食神》有一句對白：「分店一間變兩間，兩間變四間……之後再上市集資，再搞埋地產！」用這句話來形容姚君達在自由行10年來經歷的機遇，頗為貼切。他創立的米蘭站（1150）在內地客狂掃LV下上市，個人持有的銅鑼灣舖位亦升值至逾10億元。但姚君達說，這些只是「賬面數字」，現實是當租金高得難以承受、旅客組合改變時，自由行最享受的時間，已成過去。
記者：吳綺慧
憶起當年生意暢旺情況，姚君達受訪時興奮得站起身，忍不住要演示一下：「啲客多到我直情冇地方企，要搵張凳企高，然後一個個LV袋遞出去。嘩，真係諗起都開心。𠵱家仲邊有啲咁嘅生意呀！」
內地打貪 送禮收斂
姚君達於2001年創辦米蘭站，2003年即遇上開放自由行，內地客對名牌熱愛的程度令人難以置信。曾有客人一次過買了10幾個手袋，500多萬元埋單。「我心諗，佢係咪想拎啲手袋返去賣呀？最後先知佢哋公司喺上海搞房地產，要舉行周年晚會，於是買手袋回去，畀某一枱人抽獎，坐嘅都係達官貴人」。今年中央講明要嚴厲打貪，饋贈活動大為收斂。聞說現時高官現身公開場合盡量不戴手錶，並經常留連飯堂，好讓內地媒體拍照。
「送禮嘅生意幾乎冇晒，客流係冇少到，但轉晒用家主導，幾十萬元一個嘅『炒貨』手袋都跌價。呢個係陣痛期，我哋要將產品組合轉番做中價貨，過咗呢一轉就冇問題了」。
據旅發局數據顯示，去年內地旅客數量雖仍增24%，但過夜旅客每人平均消費只升4.7%，至8,565元。瑞銀今年初的研究報告指，來自北京、上海及浙江等富裕地區旅客數目，自2011年起已出現放緩，消費力較低的省份則正在增加。
姚君達記得10年前銅鑼灣波斯富街的分店月租僅2萬元，但現時四周已是金舖多過7-11。姚君達認同，現時零售業是太依賴自由行：「自由行只是政策嚟箒，可以隨時冇咗㗎喎，唔出奇㗎！但𠵱家連藥房都用100萬嚟搶租，一條街有五間藥房，風險點會唔大？」姚君達形容，租金已升到連受惠的零售商都「頂唔順」：「除非你係賣鑽石，如果唔係一定好辛苦。每一次續租，就要逼去後面一條街。好彩我哋最好生意嘅兩間分店，都係自己舖頭，如果唔係𠵱家加（租）到我死咗喇！」
一個地舖貴過米蘭站
的確，姚君達還有另一個身份，同時也是業主。2004年他購入波斯富街舖位，當時作價僅4,000萬元，現已升值近10倍，市值約4億元，該舖位仍租予米蘭站，月租60萬元；2011年，姚君達以2.9億元再買下對面馬路的另一舖位，市傳去年有人欲向姚君達買下該舖，作價7億元，單是這舖位已高過米蘭站現時的市值。「7億都唔賣喇！個舖我留返嚟養老㗎！𠵱家租畀周大福，每年收租2,000萬。」
如果沒有自由行，姚君達和米蘭站，今日會變成怎樣？姚君達想了幾秒，答道：「就算冇自由行，我哋都總會諗辦法去適應市場。當然最後會變成點，冇得估，但我覺得做生意就係咁。如果你條橋夠好，我信總有市場。」
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange