教育局局長吳克儉花名吳得掂，要「奶媽」林鄭幫拖，講嘢又經常詞不達意。噚日朝開學日，佢去咗大埔一間小學視察，副局長楊潤雄去三個過境口岸巡視跨境學童返學。吳得掂話，二人係「分道揚鑣」。吓，乜唔係分頭做嘢咩？點解話到兩人各行各路？唔通兩人貌合神離？
失言醜事多
分道揚鑣意思係指兩人意見相違，決定你走你嘅陽關道，我過我嘅獨木橋。AO出身嘅副局楊潤雄就出名叻仔，隨時功高蓋主。局長係一時失言，定係向副局發出暗示，真係佢先知。
教育局噚日下晝發佈吳局長講話全文，原本嗰句「所以同教育局副局亦都做咗個分道揚鑣嘅分工，佢今日都到去咗三個口岸」，删除咗分道揚鑣四字。新聞秘書解釋，分道揚鑣同分工意思重叠，所以整理時簡化從略。咁點解唔係保留分道揚鑣、而刪分工二字呢？
噚日被改動仲有一處，吳局長話有教師「登記」制度，意味好求其，但向來只有註冊制度，所以發言全文又幫佢改咗。
吳得掂失言最經典，喺舊年國教風波期間，老屈沉默大多數支持推行洗腦國教，激發更多人出嚟反國教。其實吳局長本來好好地，佢同啲小學生講細個時，自己執書包返小學；為咗學英文，先背字典，再學音標。但點解一入狼營就差成咁？唯一解釋係佢想學狼英語言偽術，點知得半桶水，失禮全家。
李八方
mailto:pf_lee@appledaily.com
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange