【公司專訪】
「富豪飯堂」福臨門有逾40年歷史，「五哥」徐沛鈞今年初結束與「七哥」徐維均之間的股權風波，執掌港九福臨門。五哥認為，福臨門成功並非單靠出品，「是但一個部門嘅員工出錯都影響整體，負責泊車嘅都好重要」。未來一年，他擬守好本業，伺機與賭場合作，進軍澳門。
記者：高淑嫻
攝影：江俊豪、黃偉傑
部份圖片由受訪者提供
五哥中學畢業後在會計師樓工作，一做十年，直至1972年父親徐福全在灣仔設門市，才返福臨門。他當年29歲，負責樓面、營業及會計部，胞弟七哥負責採購、廚房出品，分工合作。
五哥笑言，開業首三年，他是打雜，由於人手不足，每當高朋滿座，他就要走位，廚房遞餸、樓面寫單、傳菜、收銀等都要做，後來生意上軌道，他才專心管理。
設獎勵制度穩軍心
做過打工仔，五哥明白打工仔心態，特別重視員工穩定性，一早設立員工獎勵制度，將員工薪金水平跟公司營業額掛鈎；80年代中為員工設公積金；團年又會在外筵開30至40席，慰勞一班夥計及他們的親友，加強員工歸屬感。五哥爆料，熟客黃霑曾經免費擔任這個員工飯局的司儀，極富人情味。
雖然五哥說話時，雙眼彎起，笑咪咪，十足一位慈祥老人家，但原來他着緊起來，跟一般老闆無異。採訪其中一日，記者就目擊五哥鬧人。
當日午市時間過去，客人走得八八九九，五哥突然現身二樓營業部查詢月餅銷情，月餅券正好被人掃清，負責的同事忙於安排運送新餅券，被五哥逮個正着，皺眉「話」他們為何不準備多些月餅券存貨，反正餅券不會變壞，越講越勞氣﹗
五哥承認自己有要求，既然公司待遇不錯，員工就要用心。他以足球隊作比喻，指每個位置都重要，任何一個部門出錯都影響整體，「負責泊車嘅都好重要，佢哋喺最前線接觸個客，做得差可以趕走好多客！」
對兄弟拆夥感可惜
「做嘢無方程式，最重要係common sense。我唔係勞氣，而係忟憎啲夥計」。對夥計都如此上心，跟七哥拆夥，應該更加錐心刺骨。
五哥形容現在心情平靜，只感無奈及可惜，畢竟兩兄弟合作幾十年。不過「今日嘅結果好過打官司，對雙方都好，各取所需」，反正天下無不散之筵席。
五哥說「以前責任無咁大」，現在幾乎每日中午前都返灣仔福臨門食晏兼巡視業務，掌管福臨門的財政及大方向，長子徐德強及太太負責人事、採購、出品，女兒專責市場推廣。
面對七哥新店開張搶生意，坊間越來越多高檔中菜館，五哥處之泰然，指消費者向來多選擇，「近8至10年，人均消費1,000至3,000元食一餐嘅法國、意大利、日本菜越來越多，都可以話係競爭」。
截至今年3月底止，港九福臨門稅前盈利4,178萬元，五哥指，近年生意是最好。未來一年，他擬守好本業，伺機進駐澳門賭場；被問到是否太多賭場爭，五哥即耍手擰頭，強調「我哋只係手作仔，靠賭場老細欣賞」，謙得過份！
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24