【記者盧勁業報道】幾條小石柱盡顯政府官僚無能。九龍灣有輪椅人士投訴行人路上有四條石柱，阻礙輪椅出入，揭發出屹立20年的石柱為僭建、無人「認頭」；四個部門和兩個決策局，處理一年，問題至今仍未解決。
在九龍灣宏照道基督教勵行會旁的約三米闊小徑，是由啟業邨來往坪石邨、彩虹站的必經之路，不少街坊經此路到牛池灣街市買餸菜或往觀塘道坐巴士。但小徑的行人路上有豎了四條石柱，每條直徑約25厘米，間隔由60到70多厘米不等。
輪椅人士易傷手
有街坊指，自20多年前搬入啟業邨時，石柱已經存在。居於啟業邨靠輪椅出入的蕭東才說：「領匯嚟咗之後，街市十室九空。牛池灣街市10蚊四個橙，啟業街市就10蚊兩個。冇選擇之下，兩、三年前開始我哋每日都要花多半個鐘行遠路買餸」。
使用該路出入後，蕭和其他輪椅人士始感不便，他的輪椅闊70厘米，「石柱距離太窄，我哋買餸掛喺輪椅上成日過唔到，手推輪椅就好易整傷手」；遂向堅毅忍者障殘人士國際互助協會求助。
堅毅忍者總幹事王素琴指，「去年9月搵運輸署，運輸署話嗰個位係康文署管；康文署10月話係路政署管；之後到地政總署打嚟，話柱係屬隔籬嘅基督教勵行會管，之後又話啲柱係僭建同會清拆；但地區諮詢又有人反對，去到4月先話交由勞福局處理。到𠵱家8月都仲未解決」。
民建聯反對拆柱
蕭指，曾親自上門拜訪反對拆柱的麗晶區民建聯區議員潘進源，對方惡言相向，「（潘）話就係唔移得，你問過我未？點解未問過我就直接走去搵政府」。對方反對拆柱，只同意擴闊柱間距離至80厘米。王素琴指，這只比原本的闊度多闊幾厘米，「拆一條柱，條路都仍然唔夠兩米闊，邊可能有車入到」。
本報向潘進源查詢，他強調自己一直同意擴闊石柱間距離，「移除石柱會有車泊入行人路阻街。我一直同意拓闊石柱（距離），要1.5米先夠，咪整夠1.7米囉」。
運輸署表示，該處並非運輸署管轄範圍，該署設計的行人路闊度大約為兩米至4.5米，一般情況下足夠讓輪椅人士通過。
早前堅毅忍者障殘人士國際互助協會獲政府回覆承認石柱是僭建的。發展局回覆本報指，無法確定石柱持有人誰屬，該土地已於去年4月批出供勞福局作培訓中心用途。
勞福局回覆指，接獲市民建議將石柱變成三條品字形，間隔加闊至1.05米。民政署表示，正就事件展開第三次地區諮詢，本月底有結果。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange